e hënë 2 gusht 2021
e hënë 2 gusht 2021

 

Duke nisur nga sot, për tri ditë në Kosovë shënohet 23-vjetori i Epopesë së Ushtrisë Çlirimtare të Kosovës.

 

Më 5, 6 dhe 7 Mars në vitin 1998 është zhvilluar njëra ndër betejat më të rëndësishme të UÇK-së kundër agresionit ushtarak të ish-Jugosllavisë.

 

Forca të shumta serbe sulmuan familjen e komandantit legjendar, Adem Jashari dhe pas një rezistence të fortë, në Prekaz u vranë 55 persona ku më shumë se 20 prej tyre ishin fëmijë dhe gra.

 

Ndër të rënët ishin komandanti legjendar i UÇK-së Adem Jashari, vëlla i tij Hamëz Jashari dhe babi i tyre, Shaban Jashari. Sakrifica e familjes Jashari në krye me komandantin legjendar Adem Jashari, në Kosovë vlerësohet si kthesë e madhe qe i dha zgjidhje çështjes së Kosovës.

 

 

 

FSK-ja parakaloi ushtarakisht në përvjetorin e 23-të të Epopesë së Ushtrisë Çlirimtare të Kosovës

 

 

Në kazermën “Adem Jashari“ të FSK-së në Prishtinë, sot u shënua 23 vjetori i Epopesë së Ushtrisë Çlirimtare të Kosovës në organizimin e Qeverisë të Republikës së Kosovës. Manifestimi filloi me intonimin e himnit kombëtar dhe atij të Republikës së Kosovës, si dhe me vendosjen e kurorës me lule në obeliskun e UÇK-së, nga presidentja në detyrë Vjosa Osmani, kryeministri Abdullah Hoti, ministri i Mbrojtjes Anton Quni, komandanti i FSK-së, gjenerallejtënant Rrahman Rama dhe Bekim Jashari, djali i dëshmorët Hamëz Jashari. Në manifestim morën pjesë: Presidentja në detyrë, znj. Vjosa Osmani, kryeministri në detyrë, z. Abdullah Hoti, ministri në detyrë i Mbrojtjes, z. Anton Quni, komandanti i FSK-së gjenerallejtënant Rrahman Rama, sekretarja e përgjithshme e MM-së, znj. Rozafa Ukimeraj, përfaqësues të familjes Jashari, z. Bekim Jashari, ministra dhe zëvendësministra në detyrë të Kosovës, ambasadorë dhe atashe ushtarak të akredituar në Kosovë, ish – ministrat e Mbrojtës dhe ish komandantët e FSK-së, zyrtarë të Ministrisë së Mbrojtjes, ushtarë, nënoficerë dhe oficerë të FSK-së, zyrtarë të Policisë së Kosovës dhe përfaqësues të Shoqatave të dala nga lufta e UÇK-së.

 

 

Presidentja në detyrë, Vjosa Osmani, në fjalimin e saj, në manifestimin qendror të Epopesë së UÇK-së, ndër të tjera tha: “Të dashur ushtarë të forcës po e shënojnë sot këtë përvjetor të epopesë në kazermën që mbanë emrin e komandantit Adem Jashari sepse ai është fryma, është ideja dhe është shpirti i forcës sonë, i forcës sonë të sigurisë, i ushtrisë sonë. Sot ju bartni mbi supe përgjegjësinë e sigurisë për qytetarët tanë për shtetin tonë. Ju e keni dëshmuar se keni kapacitete jo vetëm për ta transformuar FSK-në në ushtri, por edhe për ta bërë krenar vendin tonë Kosovën, brenda dhe jashtë vendit. Sikurse Adem Jashari dikur, sot ju keni përpara misionin fisnik që ta ruani Kosovën, që ajo të mbetet një dhe e tërë, që ajo të mbetet e përhershme, sikurse dedikimi juaj dhe i yni njëkohësisht”.

 

 

Ndërsa, në fjalën e tij, kryeministri në detyrë, z. Abdullah Hoti, duke iu drejtuar ushtarëve të Kosovës, pos tjerash tha: „Të nderuar ushtarë të Kosovës, me besnikërinë ndaj Kushtetutës së Republikës së Kosovës, FSK-së dhe eprorëve tuaj, duke bartur uniformën e FSK-së, ju jeni duke përmbushur një detyrë të lartë, atë të mbrojtjes së atdheut për të cilin sakrifikuam aq shumë si popull. Ju sot po avanconi, po stërviteni e po operoni në mbrojtje të atdheut, për të mbështetur autoritetet qendrore e lokale. Unë ju them të vazhdoni në këtë formë, të ndihmoni qytetarët pa dallim, si dhe të jeni të gatshëm për të kontribuar fuqishëm për paqen, sigurinë dhe stabilitetin kudo në botë“.

 

 

Ndërsa, Bekim Jashari- djali i dëshmorit Hamëz Jasharit, duke nderuar gjakun e gjithë të rënëve për liri, gjatë fjalës së tij, pos tjerash tha: “Sot në 23 vjetorin e epopesë kujtojmë dhe nderojmë luftën e shenjtë të Ushtrisë Çlirimtare të Kosovës në krye me komandantin legjendar Adem Jashari. Sakrificën e invalidëve dhe veteranëve të UÇK-së, familjeve të dëshmorëve e martirëve dhe gjithë ata qe kontribuuan për lirinë e Kosovës, janë ata që shkruajtën historinë tonë të lavdishme, është vepra dhe heroizmi i tyre unik ai që vendosi të ardhmen e Kosovës. Sakrifica shekullore e popullit tonë, lufta dhe gjaku i derdhur ndër shekuj është bazamenti i shtetit tonë demokratik të ndërtuar me shumë mund dhe sakrificë, pra shtetin që e krijuam falë atyre, që nuk kursyen as jetën, tani e kemi amanet që ta duam e ta zhvillojmë”.

 

Manifestimi i 23-të i Epopesë së UÇK-së, u përmbyll me parakalimin e kuadrateve të FSK-së dhe me ekzekutimin artistik të Orkestrës Frymore të FSK-së.

 

 

 

 

 

 

 

 

 

 

 

 

Më shumë

Kosova miraton një rezolutë që dënon gjenocidin në Srebrenicë

Deputetët serbë në Kuvendin e Kosovës e bojkotuan seancën ku u miratua rezoluta që dënon gjenocidin në Srebrenicë. Beogradi reagoi duke e quajtur rezolutën të pritshme nga Kosova, por si befasi nga Mali i Zi.   Kuvendi i Kosovës miratoi një rezolutë me të cilën dënohet gjenocidi i vitit 1995 në Srebrenicë të Bosnjës […]

Rritja e eksportit nga Kosova në Shtetet e Bashkuara

Në Kosovë vitin e fundit eksporti drejt Shteteve të Bashkuara të Amerikës ka shënuar rritje mbi 50 për qind. Vetëm deri në muajin qershor të këtij viti, kompanitë prodhuese kanë eksportuar rreth 40 milionë euro mallëra në shtete të ndryshme amerikane.   Në vitin 1994, Shaqir Palushi nga një fshat i komunës së […]

Mbajtja e liturgjisë tek kisha serbe në oborrin e Universitetit të Prishtinës, Çeku: “Presion” mbi gjykatën

​​​​​​​Ministri i Kulturës, Rinisë dhe Sportit, Hajrullah Çeku, ka folur për mbajtjen e liturgjisë nga kisha ortodokse serbe në kishën e ndërtuar në oborrin e Universitetit të Prishtinës.   Çeku ka thënë se Policia e Kosovës nuk ka qenë e lajmëruar për këtë aktivitet dhe ka thënë se Qeveria nuk do të lejojë […]

Qeveria e Kosovës miraton heqjen e leje qëndrimit të përkohshëm me Shqipërinë

Qeveria e Kosovës ka miratuar në parim Marrëveshjen Ndërkombëtare ndërmjet Qeverisë së Republikës të Kosovës dhe Këshillit të Ministrave të Republikës së Shqipërisë për heqjen e leje qëndrimit të përkohshëm.   Zëvendësministri i Punëve të Brendshme, Blerim Gashani, tha se kjo projektmarrëveshje është në frymën e interesave të përbashkëta në kuadër të bashkëpunimit bilateral […]

  • © 2017 Albanian Profile Të gjitha të drejtat e rezervuara