Shqipëria pritet të humbasë 1,4% të Prodhimit të Brendshëm Bruto për shkak të koronavirusit. Alarmi vjen nga Banka Botërore, sipas së cilës, humbjet e mëdha do të vijnë për shkak të ndalimit të udhëtimeve si dhe masave të marra për parandalimin e pandemisë, që ka sjellë mbylljen e bizneseve në vend.
Sipas Bankës Botërore, goditjen më të fortë nga pandemia do ta marrë sektori i transportit dhe turizmit, ku tashmë operatorët turistikë kanë nisur pushimet nga puna.
Ndërkaq, në raportin e saj, Banka Botërore evidenton se ekonomia mund të shohë një përmirësim në tremujorin e fundit të 2020-s, nëse situata e koronavirusit arrin të kontrollohet.
Këto humbje të mëdha në ekonomi pritet të kompensohen pjesërisht nga procesi i rindërtimit si dhe prodhimi i energjisë elektrike.
Sa i takon borxhit publik, institucioni financiar ndërkombëtar deklaron se pritet të rritet mbi nivelin e 70% të Prodhimit të Brendshëm Bruto.
