e martë 21 shtator 2021
e martë 21 shtator 2021

 

Ish kryeministri Sali Berisha nuk do të jetë pjesë e grupit parlamentar të Partisë Demokratike, forcës politike të cilën ai e themeloi në vitin 1990, dhe që e udhëhoqi deri në vtin 2013, kur dha dorëheqjen pas humbjes së zgjedhjeve të atij viti. Vendimin për ta lënë atë jashtë e bëri të ditur sonte, kryetari demokrat Lulzim Basha, në një deklaratë publike, duke shpjeguar se ky akt vjen pasi Departamenti amerikan i shtetit i ka ndaluar ish kryeministrit dhe ish presidentit të vendit, dhe familjes së tij, hyrjen në territorin e Shteteve të Bashkuara..

 

“Zoti Berisha ka bërë të qartë se kjo është një çështje personale e tij dhe ku Partia Demokratike dhe Grupi Parlamentar i Partisë Demokratike nuk duhet të përfshihen. Për të shmangur çdo keqkuptim dhe për të konkretizuar këtë qëndrim të vetë z. Berisha, kam vendosur që deri në përfundimin e shqyrtimit të kërkesës ligjore për transparencë dhe zbardhjes së plotë të kësaj çështje në rrugë gjyqësore, zoti Berisha nuk do të jetë anëtar i Grupit Parlamentar të Partisë Demokratike”, deklaroi Basha duke shtuar se “kjo do të shmangte keqpërdorimin e çështjes nga kushdo, për të dëmtuar interesin e demokratëve dhe Partisë Demokratike, dhe do i hiqte alibinë cilitdo për të mbrojtur të keqen e vetme të Shqipërisë që është keqqeverisja dhe korrupsioni 8 vjeçar i Edi Ramës”.

 

Basha i kushtoi një pjesë të mirë të fjalës së tij vlerësimit të figurës së zotit Berisha. “Ky vendim i sotëm nuk cënon aspak kontributin dhe arritjet e zotit Berisha si lider historik i Partisë Demokratike dhe si President apo Kryeministër i Shqipërisë gjatë këtyre 30 viteve. Nuk cënon aspak atë që përfaqëson Sali Berisha për historinë e Partisë Demokratike”, u shpreh kryetari demokrat, ndërsa nënvizoi më tej se “ky vendim i sotëm, aspak i lehtë për mua, si në aspektin politik, por mbi të gjitha në atë njerëzor, por besoj edhe për çdo demokrat, ka si udhërrëfyes të tij, si kurdoherë, vetëm interesin e demokratëve, interesin e Partisë Demokratike, interesin e qytetarëve shqiptarë”

 

Sipas Bashës, vendimi për të lënë jashtë grupit parlamentar demokrat zotin Berisha lidhet pikërisht me këtë interes. “Ju më keni besuar drejtimin e Partisë Demokratike për të marrë edhe vendime që lëkundin emocionet tona. Mirëpo, secili prej nesh, duke nisur nga unë i pari, ka detyrimin për të sakrifikuar nga vetja për interesin e Partisë Demokratike, për interesin e demokratëve, për interesin e qytetarëve shqiptarë”, deklaroi Basha.

 

Disa javë më parë, ambasadorja amerikane Yuri Kim, kërkoi publikisht, pas një takimi me zotin Basha, distancimin e partisë Demokratike nga Berisha, duke bërë të ditur se priste një reflektim për çështjen para nisjes së sesionit parlamentar.

 

Nga ana e tij ish kryeministri Berisha reagoi ashpër ndaj deklaratave të zonjës Kim, duke deklaruar se ai nuk do të heqë dorë nga mandati i tij dhe se PD duhet të kërkonte prova e fakte.

 

Sonte, pas vendimit të shpallur nga Basha, ish udhëheqësi historik i demokratëve u shpreh me tone zhgënjyese. “Vendim jashtë çdo lloj norme staturore e ligjore të vendit. Një vendim të tillë një njeri që respekton parimet më elementare të një force politike të lirë nuk mund ta marrë. Unë e kuptoj presionin e jashtëzakonshëm që ai ka patur, por pavarësisht nga presioni, mendoj se disa herë më parë, zoti Basha duhet të konsideronte dorëheqjen e tij se sa të dorëzonte sovranitetin e PD-së”, deklaroi ai në një intervistë në televizionin Syri.Tv.

 

Për zotin Berisha, vendimi i kryetarit Basha është “asgjesues për Partinë Demokratike”. Ai tha se “e kuptoj presionin e madh, por njeriu i civilizuar ndodhet para rrethanave që nuk pranon kurrë një vendim i cili faktikisht asgjëson forcën politike opozitare, PD. Për të marrë një vendim të tillë, zoti Basha duhet të mblidhte kongresin e PD-së, të ndryshonte statutin e PD-së, të vendoste një nen në statut në të cilin të sanksionohej, përjashtimi nga grupi i personave të cilët përcaktohen “non grata” nga SHBA-të apo një vend tjetër. Ky nen nuk ekziston dhe nuk mund të ekzistojë pa transparencën. Në këtë kontekst, për interesa apo qëllime të caktuara, shpalli një vendim që është nul, se është një vendim i tij dhe asnjë forumi të PD-së”.

 

Me një ndikim ende të fortë në PD, zoti Berisha foli me terma të përgjithshme për lëvizjet e tij të ardhshme, por duke bërë të qartë se nuk ka ndërmend të qëndrojë duarkryq. “Do të bëj gjithshka për rivendosjen e sovranitetit të PD-së, rikthimin e saj në ato parime të cilat i shkelmoi sot në mënyrë të paimagjinueshme, Lulzim Basha dhe pa të cilat, forca politike është një fasadë opozitë””, deklaroi ai, pa dhënë detaje, në një tjetër intervistë, për televizionin Klan.

 

Vendimi i njoftuar nga zoti Basha, ka sjell pështjellim në radhët e deputetëve të PD-së. Mbledhja e grupit parlamentar, e zhvilluar menjëherë pas deklaratës së kryetarit demokrat, është zhvilluar në një atmosferë jo pak të tensionuar, ku nuk kanë munguar zëra që e kanë kritikuar ashpër zotin Basha, duke e akuzuar atë se ka vrarë PD dhe se ka mohuar historinë e kësaj force politike.

 

 

Reagimet:

 

Largimi i Berishës, kush e mbështeti dhe kush e kundërshtoi Bashën

Pas vendimit të Lulzim Bashës për të larguar nga grupi parlamentar i PD themeluesin e saj Sali Berisha, brenda kësaj force kanë lindur zërat pro dhe kundër vendimit. Në mbledhjen që sapo përfundoi, deputetët Enkelejd Alibeaj, Dashnor Sula, Tomor Alizoti dhe Agron Gjekmarkaj kanë dalë pro vendimit të Bashës, ndërkohë që kundër tij ka qenë një grup prej 7 deputetësh.

 

Sipas informacioneve jozyrtare, deputetët Oerd Bylykbashi, Flamur Noka, Tritan Shehu, Luçiano Boçi, Bujar Leskaj dhe Alban Vokshi kanë kundërshtuar vendimin e kryetarit.

 

Në dalje të mbledhjes, Flamur Noka tha: “Sali Berisha është njeriu më proamerikan i 30 viteve të fundit të demokracisë. Berisha themeloi PD-në u ngrit kundër regjimit mbi vlerat dhe parimet e demokracisë amerikane u themelua PD. Busulla ka një dhe vetëm një e Berishës dhe e PD-së: Orientimi i euroatlantik. Në lidhje me vendimin Berisha po ecën në drejtimin që ka mbajtur. Përjashtimi është mohim i Partisë Demokratike, është të mohosh suksesin e kësaj force. Arsyet pse e ka marrë këtë vendim i di kryetari sepse e ka marrë vetë”.

 

Largimi i Berishës, reagon dhëndri i tij: Po e shtyjnë të bëhet legjendë 

Njëkohësisht ka reaguar edhe Jamarbër Malltezi, dhëndri i Berishës i cili përmes një postimi në Facebook, shprehet se tashmë Berishën po e shtyjnë të bëhet legjendë.

“Berisha ka qene hero i democracise, tash po e shtyjne te behet legjende. Se pa asnje pushtet mbi bote po sfidon kryediplomatin e botes ne gjyq dhe po deklarohet burrerisht kundra Soros qe ka fut ne xhep gjithe politikanj, media, ojq e dreqtesi. Forcen me te madhe ka qe eshte vetvetja, burri me i ndershem ne kete vend dhe per pasoje i pashantazhueshem”, shkruan malltezi ndërsa e shoqëron postimin me një foto të Berishës dhe ish-presidentit Bush.

 

Berisha: Do të krijoj aleancë me çdo demokrat

Sali Berisha tha në një lidhje në emisionin “Opinion” se do të marri çdo aksion për të vendosur sovranitetin e PD.

“Do të krijoj aleancë, do të bashkëpunoj me çdo demokrat që beson se ky vend do të ketë opozitë sovrane, do të ketë PD sovrane”, tha ndër të tjera Berisha.

 

Pjesë nga intervista

 

Fevziu: A u zhgënjeve që e morë dhe zgjodhe Lulzim Bashën në krye të PD?

Berisha: Absolutisht nuk zgjodha unë, e zgjodhën anëtarët e PD në një garë të hapur, por për vendimin e tij të sotëm mendoj se për interesa të veta ai i ka bërë goditjen më të rëndë, vendit, PD-së dhe pluralizimit në Shiqëpëri.

 

Cili do të jetë reagimi juaj?

Ajo që kam shprehur dje në intervistë. Do bëj gjithçka për rikthimin e sovranitetit të PD, për të kthyer ato parime që i shkelmoi sot në mënyrë të paimagjinueshme Basha, dhe pa të cilat forca politike është një fasadë -opozitë.

 

Fevziu: Veç parlamentit do të ketë aksion tjetër nga ana juaj?

Berisha: Pa diskutim do të marr cdo aksion për të vendos sovranitetin e PD. Do të krijojë aleancë, do të bashkëpunoj me çdo demokrat që beson se ky vend do të ketë opozitë sovrane, do të ketë PD sovrane.

 

 

Berisha: Nesër do të jem në kuvend, Basha duhej të mblidhte Kongresin

 

Sali Berisha tha se nesër do të shkojë në kuvend edhe pse që nga ky moment nuk do të jetë më pjesë e grupit parlamentar të forcës që themeloi vetë.

 

“Padiskutim nesër do shkoj në Kuvend”, tha Berisha në Syri.net.

 

Ai u shpreh se Basha e ka marr vendimin pa pyetur forumet e partisë. “Për të marrë në vendim të tillë Basha duhet të mblidhte kongresin e PD dhe të ndryshonte statutin ku te shtonte nenin që përjashtohen personat e shapllur non grata nga SHBA apo ndonjë vend tjetër. Ky është vendimi i Bashës dhe asnjë forumi tjetër të partisë”,tha Berisha.

 

 

 

 

 

 

 

Më shumë

Grup parlamentar paralel me PD

Pasditen e se mërkurës, aleatët e Partisë Demokratike pritet të mblidhen për të diskutuar për mënyrën se si do të strukturohen dhe organizohen në Kuvend.   Rregullorja e Kuvendit, sanksionon që një grup parlamentare nuk mund të krijohet pa pasur 7 deputet.   Asnjë nga forcat politike me përjashtim të demokratëve dhe socialistëve […]

Kancelarja Merkel viziton Shqipërinë më 14 Shtator

Kancelarja gjermane Angela Merkel do të vijë në Shqipëri më 14 Shtator. Bëhet me dije se vizita e kancelares gjermane vjen në kuadër të procesit të Berlinit.   Kjo do të jetë vizita e fundit e Merkel si kancelare jashtë vendit. Ajo do të takojë liderët e Ballkanit Perëndimor.

Shqipëria dënoi aneksimin e Krimesë, reagon Rusia

Rusia ka reaguar për Samitin “Platforma për Krimenë” të zhvilluar pak ditë më parë ku mori pjesë edhe Shqipëria me përfaqësuese ministren e Shtetit për Marrëdhëniet me Kuvendin, Elisa Spiropali.   Samiti miratoi një deklaratë të përbashkët për mbështetjen e Ukrainës kundër agresionit rus në rastin e Krimesë.   “Mbështetje e palëkundur për integritetin […]

  • © 2017 Albanian Profile Të gjitha të drejtat e rezervuara