BE jep 103.3 milionë € në ndihmë të rrugës evropiane dhe rimëkëmbjes ekonomike të Shqipërisë

Komisioni Evropian ka miratuar një paketë prej 103.3 milionë € për të mbështetur Shqipërinë. Programi i miratuar përqendrohet në çështjet thelbësore për pranimin në BE, të tilla si shteti i së drejtës, të drejtat themelore dhe qeverisja e mirë. Për më tepër, ofrohet ndihmë për të trajtuar më tej pasojat e krizës së COVID-19.

Komisioneri i BE-së për Fqinjësinë dhe Zgjerimin, Olivér Várhelyi, komentoi: “Bashkimi Evropian vazhdon të qëndrojë pranë Shqipërisë. Përballë krizës COVID-19, ne kemi bërë përshtatje të fondeve ekzistuese për ta ndihmuar Shqipërinë të përballojë sfidat aktuale sociale dhe ekonomike. Në të njëjtën kohë, fondet e BE-së synojnë të mbështesin reformat kryesore që Shqipëria duhet të zbatojë për të ecur përpara në rrugën e saj evropiane“.

Programi përfshin veprime për të forcuar shtetin e së drejtës dhe luftën kundër krimit të organizuar dhe korrupsionit, duke përmirësuar kapacitetin e Prokurorit Special për Antikorrupsionin, Byrosë Kombëtare të Hetimit dhe institucioneve të pavarura të drejtësisë.

Janë caktuar gjithashtu financime për zhvillimin e një tregu dinamik të tokës në Shqipëri, përmes krijimit të një kuadri të qartë të të drejtave të pronës. Paketa gjithashtu vazhdon të mbështesë përmirësimin e kapacitetit të sektorit publik për t’iu përgjigjur nevojave të qytetarëve dhe bizneseve. Programi do të funksionojë si në nivelin kombëtar ashtu edhe në atë vendor.

BE-ja do të vazhdojë ta mbështesë pjesëmarrjen e Shqipërisë në programet e BE-së, të tilla si Erasmus+ dhe Horizon2020.

Së fundi, paketa aktuale plotëson masat e tjera të lidhura me COVID-19 të vendosura për Shqipërinë nga BE-ja, duke e shtrirë mbështetjen te bizneset dhe ekonomia në përgjithësi.

Konteksti

Programi Vjetor i Veprimit 2020 për Shqipërinë përfshin shtatë veprime:

• BE për Qeverisje të Mirë (48.1 milionë €)
• Mbështetja e BE-së për pjesëmarrjen në Programet e Bashkimit Evropian (1.5 milionë €)
• Struktura e Integrimit në BE (8.3 milionë €)
• BE për Shtetin e së Drejtës (5 milionë €)
• BE për të Drejtat e Pronësisë (5.7 milionë €)
• Operacioni Ndërkombëtar i Monitorimit (ONM) Faza II (8.7 milionë €)
• BE për Rimëkëmbjen Ekonomike (26 milionë €)

Pas shpërthimit të COVID-19, fondet ekzistuese të BE-së u riorientuan me objektivin e dyfishtë për ta ndihmuar Shqipërinë të marrë furnizime dhe pajisje emergjente shëndetësore, si dhe për të trajtuar pasojat sociale dhe ekonomike të krizës. Paketa COVID-19 për Shqipërinë arrin në 50.65 milionë €. Programi IPA 2020  prej 103.3 milionë € kontribuon në paketën COVID-19 me veprimin BE për Rimëkëmbjen Ekonomike prej 26 milionë €. Përveç kësaj, paketa COVID-19 përfshin:

•   4 milionë € për të trajtuar nevojat e menjëhershme për furnizime dhe pajisje mjekësore. Financimi vjen nga programi IPA 2017
•   20.65 milionë € për të plotësuar një program ekzistues prej 50 milionë eurosh për Përfshirjen Sociale në kuadrin e IPA 2019.

Ky program përfshin një alokim shtesë prej 28 milionë €, dhënë për të shpërblyer përparimin e Shqipërisë në zbatimin e reformave.

• 

  Habit ambasadori turk në Tiranë: Osmanët erdhën për të mbrojtur shqiptarët

• 

  Zhvarrimet e kundërshtarëve të diktaturës, vazhdojnë debatet për procedurat

• 

  ATP e bllokuar nga Kushtetuesja, por paditë rriten

• 

  Shifra të frikshme/ 3212 aksidente nga janari deri në nëntor të këtij viti, 165 jetë të humbura

• 

  Tirana feston Hanukkhah, festivalin e dritave të hebrenjve

• 

  100 vjet – Hasan Prishtina, Kryeministër i Shqipërisë: Ekspozitë me dokumente arkivore në Shkup, Prishtinë e Tiranë