e diel 14 gusht 2022
e diel 14 gusht 2022

 

Ish kryeministri Sali Berisha kritikoi ashpër deklaratat e pak ditëve më parë të ambasadores amerikane Yuri Kim, e cila kërkoi që ai të mos jetë pjesë e parlamentit pas vendimit të Departamentit amerikan që i ndalon atij hyrjen në shtetet e Bashkuara. Zoti Berisha tha se kreu demokrat Basha i kishte kërkuar ambasadores prova e përsëriti se nuk ka forcë në botë që ta pengojë atë të jetë në sallë si pjesë e Partisë Demokratike. Në një reagim të saj, zyra e Shtypit e ambasadës amerikane theksoi se do të përdorin të gjitha instrumentat në dispozicion për t’u përballur me korrupsionin dhe pandëshkueshmërinë.

 

Ish kryeministri Sali Berisha u shpreh sot i bindur se vendimi që i ndalon atij dhe familjes së tij hyrjen në Shtetet e Bashkuara, është “një akt i pabazuar në prova dhe fakte”. Ndërsa bëri të ditur se avokati i tij francez kishte dorëzuar në një nga gjykatat e shkallës së parë të Parisit padinë për shpifje ndaj Sekretarit amerikan të Shtetit Blinken, zoti Berisha shtoi se bëhej fjalë për “një vendim kryekëput politik”.

Sipas tij këtë e konfirmoi dhe kërkesa e pak ditëve më parë e ambasadores amerikane Yuri Kim për mosfutjen e tij në parlament. Një kërkesë për të cilën nga Partia Demokratike nuk ka patur asnjë reagim zyrtar. Kryetari demokrat Lulzim Basha ka heshtur. Por qëndrimin e këtij të fundit e bëri të ditur sot vetë zoti Berisha: “Kryetari i Partisë Demokratike, i është përgjigjur kërkesës së zonjës Kim, me kërkesën e tij: Paraqini, fakte, dokumenta e prova. Kjo është përgjigja që ka marrë zonja Kim nga kryetari i PD. Dhe unë për këtë e falenderoj dhe e përgëzoj”.

Ambasadorja amerikane deklaroi pas takimit të para disa ditëve me zotin Basha se “do të ishte një ironi historike por edhe një tragjedi për vendin, jo vetëm për partinë, nëse partia do të hante bar për hir të interesave personale të një njeriu“. Një deklaratë të cilën zoti Berisha e ka quajtur më skandalozen që një ambasador ka bërë në këto 30 vite, duke shtuar se “mendoj se PD duhet t’i kërkojë zonjës, që të kërkojë ndjesë publikisht”.

Ndërsa duket se në këtë përballje me Shtetet e Bashkuara ai po e lidh fatin e Partisë Demokratike, me çështjen e tij, ish kryeministri nga njëra anë u shpreh se PD nuk ka pse të angazhohet në këtë betejë, dhe nga ana tjetër i tregoi partisë së tij se çfarë duhet të bëjë në këtë rast. “PD dhe cilido tjetër, mendoj unë, ka një detyrë: Të kërkojë, fakte, prova e dokumenta. Ka dhe një detyrë tjetër. Në mungesë të tyre të mos pranojë kurrë diktatin. Sepse diktati të çon te bari, tek fyerjet e poshtërimet që bëhen me barin”, u shpreh zoti Berisha.

Ai dhe një herë përsëriti se nuk ka ndërmend të tërhiqet nga parlamenti.“Nuk ka forcë në botë, përveç të gjithfuqishmit, që mund të më pengojë mua të ushtroj misionin tim të besuar nga zgjedhësit shqiptarë. Kjo është përfundimtare. Në parlament unë do futem ashtu siç më kanë votuar qytetarët shqiptarë”.

Në një editorial të sajin për gazetën Panorama, ambasadorja amerikane u shpreh dje se “do të kërkoj që Edi Rama, Lulzim Basha, si dhe udhëheqës të tjerë të kontrollojnë listat edhe njëherë për t’u siguruar që kur të kthehen në parlament, njerëzit të mund të jenë krenarë për përfaqësuesit e tyre”.

Vendimi për zotin Berisha erdhi pasi Departamenti i Shtetit e përfshiu atë në kategorinë e “zyrtarëve të korruptuar që kishin minuar demokracinë”. Në një reagim për deklarimet e sotme të ish kryeministrit, Zyra e Shtypit e ambasadës amerikane vuri në dukje se “mes urdhërit ekzekutiv të presidentit Biden, shpalljeve nga Sekretari Shtetit, deklaratave të ambasadores Kim para mediave javën e kaluar, dhe editorialit të saj këtë javë, pozicioni i SHBA-ve, është i qartë dhe i pandryshuar: Lufta kundër korrupsionit përbën një interes thelbësor për sigurinë kombëare të SHBA-ve dhe ne do të përdorim të gjitha instrumentetet në dispozicion për t’u përballur me korrupsionin dhe pandëshkueshmërinë”, nënvizon reagimi i ambasadës amerikane.

 

Më shumë

“Non-grata”, Berisha shkon me ‘Foltoren’ në SHBA

Të dielën e 5 dhjetorit ora 12:00 me orën lokale, do të zhvillohet ‘Foltorja’ e ish-kryeministrit Sali Berisha me shqiptarët e Amerikës. Njoftimin e ka bërë publik lideri historik i PD përmes një postimi në Facebook. Organizimi është bërë nga diaspora shqiptare në SHBA.   Takimi do të zhvillohet me video-konferencë njësoj sikur të […]

Dekriminalizim e dorëheqje, si mbetën 6 bashki pa kryetar

Vënia nën akuzë nga SPAK i kryebashkiakut të Mallakastrës, Qerim Ismailaj, dhe mënyra se si do t’i rrjedhë përballja me drejtësinë për akuzën e “falsifikimit”, nuk e përjashton mundësinë e ndërprerjes së mandatit të tij.   Por nga ana tjetër, në vend janë gjashtë bashki të cilat nuk e kanë një kryetar të […]

Shtyhet ngritja e komisionit të reformës zgjedhore

Miratimi i komisionit të posaçëm të reformës zgjedhore është tërhequr nga seanca e sotme në Kuvendin e Shqipërisë.   Vendimi ka ardhur pas kërkesës së kreut të grupit parlamentar të Partisë Demokratike, Alfred Rushaj.   Kjo për faktin se palët ende nuk janë dakordësuar për objektin e komisionit të posaçëm të reformës zgjedhore. […]

Kuvendi i Shqipërisë ratifikon konventën me Izraelin për shmangien e taksimit të dyfishtë

Kuvendi i Shqipërisë ratifikon konventën me Izraelin për shmangien e taksimit të dyfishtë. Ministrja e Financave Delina Ibrahimaj ka prezantuar në Kuvend projektligjin që do të votohet ditën e sotme mbi konventën e nënshkruar mes Shqipërisë dhe Izraelit.   Sipas saj kjo konventë do të bëjë që çdo shtetas apo biznes që zhvillon […]

  • © 2017 Albanian Profile Të gjitha të drejtat e rezervuara