e mërkurë 18 maj 2022
e mërkurë 18 maj 2022

 

 

Sekretari amerikan i Shtetit, Antony Blinken paralajmëroi të premten se mosarritja e një marrëveshjeje të përkohëshme për të mbikqyrur programin bërthamor të Iranit mund të bëhet shkak që SHBA të braktisë përpjekjet për të ringjallur marrëveshjen bërthamore.

 

“Do shohim nëse mund të gjejmë rrugën e përbashkët për këto mospajtime reale. Por duhet të përpiqemi dhe ta ngushtojmë hendekun,” tha shefi i diplomacisë amerikane në një konferencë për shtyp në Paris pas takimit me homologun francez, Jean Yves Le Drian. “Do t’ju them se kur bëhet fjalë për Agjencinë Ndërkombëtare të Energjisë Atomike, programi bërthamor përbën shqetësim serioz, gjë që ia kemi bërë të qartë Iranit dhe që duhet zgjidhur”.

 

Agjencia Ndërkombëtare për Energji Atomike tha se një marrëveshje tre mujore për mbikqyrje të përkohëshme të programit iranian, e arritur më 21 shkurt skadoi të enjten, pasi ishte shtyrë për një muaj. Agjencia tha se po negocion me Teheranin për një zgjatje të dytë të marrëveshjes.

 

Sekretari Blinken, i cili ndodhet në Paris në kuadër të turneut të tij në tre vende evropiane, pohoi më parë të premten se SHBA mund të vendosin të mos rikthehen në marrëveshje nëse negociatat e Vjenës nuk shënojnë përparim.

 

“Do të vijë momenti kur do të jetë e vështirë të kthehemi në standardet e përcaktuara nga Plani i Përbashkët për Veprim,” tha ai duke iu referuar marrëveshjes së 2015 që synonte të pengonte aktivitetin e Iranit për pasurimin e uraniumit, në shkëmbim për lehtësimin e sanksioneve perëndimore.

 

Palët në negociata kanë zhvilluar negociata prej gjashtë javësh dhe përmbyllën të shtunën një raund bisedimesh jo të drejtpërdrejta por pa gjetur zgjidhje për mospatimet madhore.

 

Ministri i Jashtëm francez Jean Yves Le Drian u bëri jehonë paralajmërimeve të zotit Blinken, duke u thënë gazetarëve se i takon Iranit të mundësojë avancimin e bisedimeve.

 

“Kanë kaluar gjashtë javë që kur rifilluan bisedimet. Është arritur një farë përparimi dhe tani po hyjmë në fazën më të vështirë që kërkon vendime të forta e të guximshme nga ana e autoriteteve të Iranit. Tani është momenti,” tha zoti Le Drian.

 

Të premten në darkë zoti Blinken u takua me Presidentin e Francës, Emmanual Macron.

 

Sekretari amerikan i Shtetit mbërriti në Francë pas vizitës në Gjermani, ku të enjten ai dhe udhëheqja gjermane thanë se po bashkojnë forcat për t’iu kundërvënë anti-semitizmit dhe teorive që nuk pranojnë se Holokausti ndodhi në realitet. Sekretari i Shtetit tha se këto përpjekje do të garantojnë “se brezat e tanishëm dhe të ardhshëm do të mësojnë se çfarë ndodhi gjatë Holokaustit dhe do të nxjerrin mësime nga këto ngjarje”.

 

Në Berlin, gjatë vizitës në përmendoren për hebrenjtë e vrarë në Evropë, zoti Blinken tha se anti-semitët dhe ata që mohojnë ekzistencën e Holokaustit kanë shumë të përbashkëta me individë që përqafojnë homofobinë, ksenofobinë, racizmin dhe forma të tjera diskriminimi dhe janë bërë “kushtrimi që mbledh ata që duan të rrëzojnë demokracitë tona”. VOA

 

Më shumë

Duke shpresuar se Omicron nuk do të shkatërrojë Krishtlindjet, Betlehemi ndez dritat e pemës

BETHLEHEM, Bregu Perëndimor, 4 dhjetor (Reuters) – Banorët ndezën një pemë gjigante të Krishtlindjeve jashtë Kishës së Lindjes së Betlehemit të shtunën, duke shpresuar që një variant i ri i koronavirusit të mos prishë një sezon tjetër pushimi në vendlindjen tradicionale të Jezusit. Betlehemi u mbyll vetëm Krishtlindjet e kaluara, duke humbur sezonin […]

Zgjerimi i ndikimit turk rrit tensionet me Iranin

Arrestimi i agjentëve iranianë në Turqi muajin e kaluar, thonë analistët, është shenja më e fundit e rritjes së tensioneve midis dy fqinjëve. Kjo po ndodh ndërsa Turqia po zgjeron ndikimin e saj në rajonin e Kaukazit në dëm të Iranit.   Forcat turke të sigurisë arrestuan agjentët iranianë për të cilët Turqia […]

Energjia atomike energji e gjelbër?

Gjermania dhe disa shtete të BE kundërshtojnë kategorizimin e energjisë atomike si energji të gjelbër. Por shumica e vendeve të BE e mbështet këtë, mes tyre edhe Franca.     Gjermania dhe katër shtete të tjera e kundërshtuan hapur në Glasgou, ku përfundoi Konferenca Botërore për Klimën, kategorizimin e energjisë atomike si energji të […]

Izraeli mohon akuzat për spiunazh në Turqi

Izraeli është angazhuar për lirimin e një çifti izraelit të cilët janë dërguar në mbajtje nga ana e autoriteteve turke, tha kryeministri izraelit, Naftali Bennett.   Media shtetërore turke ka thënë se izraelitët e ndaluar ishin spiunë.   Kryeministri Bennett tha përmes një deklarate se ai ka biseduar me familjen e dy izraelitëve, […]

  • © 2017 Albanian Profile Të gjitha të drejtat e rezervuara