e mërkurë 8 dhjetor 2021
e mërkurë 8 dhjetor 2021

 

Përfaqësuesit e diplomacisë amerikane dhe europiane nxitën sot qeverinë e Shqipërisë të shtojë përpjekjet për të dërguar në burg trafikantët e qenieve njerëzore dhe të kujdeset, që viktimat e tyre të riintegrohen në shoqëri.

 

OSBE organizoi sot një konferencë me diplomatë, donatorë, zyrtarë dhe veprimtarët e të drejtave njerëzore.

 

Në mesazhet për zyrtarët dhe veprimtarët, ambasadorja e SHBA-ve, Yuri Kim, theksoi se Shqipëria me gjithë faktorët e saj, qeveria, shoqëria civile, mediat dhe të tjerët duhet t’u bashkohen me përpjekjen botërore për t’i dhënë fund trafikimit të qenieve njerëzore.

 

“Ne e nxitim qeverinë shqiptare të ripërtërijë përpjekjet për të identifikuar viktimat e trafikimeve, t’u japë atyre strehë dhe të dërgojë trafikantët në burgje” – tha ambasadorja Kim.

 

Ajo i bëri këto komente sot në një konferencë të organizuar nga OSBE mbi bashkimin e përpjekjeve kundër trafikimit të qenieve njerëzore.

 

Trafikantët, tha ajo, përfaqësojnë “një kërcënim të pazakontë dhe të jashtëzakonshëm për sigurinë kombëtare dhe politikën e jashtme të Shteteve të Bashkuara”, ndaj ata do të ndalohen të hyjnë në SHBA.

 

“Presidenti Biden dhe Sekretari Blinken e kanë bërë të qartë se korrupsioni, abuzimet me të drejtat e njeriut dhe krime të tjera destabilizuese përbëjnë kërcënime për sigurinë kombëtare të SHBA dhe për botën. Urdhëri Ekzekutiv i Presidentit Biden lidhur me Ballkanin Perëndimor e ngre mbrojtjen e të drejtave të njeriut, si dhe luftën kundër trafikimit njerëzor, në një përparësi kombëtare për Shtetet e Bashkuara. Ne synojmë t’u kërkojmë llogari atyre që janë përgjegjës ose bashkëpunëtorë në abuzime serioze me të drejtat e njeriut në Ballkanin Perëndimor” – tha zonja Kim.

 

Së bashku me shoqërinë civile dhe organizatat joqeveritare që drejtojnë tre prej strehëzave të Shqipërisë për viktimat e trafikimit, policia dhe drejtësia, sipas saj, mund të ringjallin përpjekjet për të identifikuar më shumë viktima, për të ndjekur penalisht dhe dënuar trafikantët dhe për të përgatitur të trafikuarit që të rihyjnë në shoqëri.

 

“Nëse keni një vizë amerikane apo një peticion për një vizë emigrimi, nuk do t’iu hyjnë më në punë, sepse nëse trafikoni qenie njerëzore, qeveria e SHBA mund të ndërmarrë veprime kundër pronës suaj, nëse kalon përmes ose ka një lidhje me Shtetet e Bashkuara” – tha ambasadorja Kim.

 

Ndërsa ambasadori Luigi Soreca, drejtues si delegacionit të BE-së në Shqipëri, tha se autoritetet e njohin dhe e pranojnë trafikimin e qenieve njerëzore si një problem shqetësues.

 

“Shqipëria vend burimi, kalimi dhe mbërritje për trafiqet e qenieve njerëzore, po ashtu si edhe shumë vende të tjera në rajon. Ajo ka marrë masa të forta kundër kësaj dukurie, duke nisur nga mekanizmi i referencës, ndryshimi i ligjeve deri tek zbatimi i tyre më i plotë në terren” – tha ambasadori Soreca.

 

Ai shtoi se BE-ja ka vënë në dispozicion të autoriteteve shqiptare një oficer ndërlidhës të Europol në Tiranë që nga viti 2019 si dhe njësitë e Frontex në jug të Shqipërisë në kufirin tokësor dhe atë detar.

 

“BE dhe Shqipëria po përballen me sfida të përbashkëta kundër trafikimit të qenieve njerëzore. Ne mund të kemi sukses në luftën kundër krimit të organizuar vetëm nëse të gjithë aktorët përkatës punojnë ngushtë së bashku në nivel kombëtar e ndërkombëtar edhe në Shqipëri. Ne duhet të punojmë të gjithë së bashku për ta kthyer edhe në Shqipëri trafikimin e qenieve njerëzore nga një krim me rrezik të ulët me fitim të lartë, në një krim me rrezik të lartë me fitim të ulët” – tha ambasadori Soreca,

 

Organizatorët renditën se Shqipëria është anëtare e NATO-s që nga viti 2009, ishte Kryetare e Zyrës së OSBE-së në vitin 2020, sapo fitoi një vend në Këshillin e Sigurimit të OKB për dy vitet e ardhshme dhe është në prag të hapjes formale të negociatave për anëtarësimin e plotë në BE.

 

Ata shtuan se integrimi më i lartë sjell edhe më shumë angazhime në luftën ndaj krimit të organizuar dhe trafikimeve në rajon dhe në botë.

 

Në një raport të vitit 2020 nga Zyra e OKB-së për Drogën dhe Krimin theksohet se numri i viktimave të diktuara në trafikim është rritur.

 

Shumica dërrmuese e rasteve thjesht kalojnë pa u vënë re dhe pjesa më e madhe e viktimave janë gra dhe fëmijë.

 

Vëzhguesit pohuan se trafikimi i qenieve njerëzore ushqehet nga pabarazia shoqërore dhe ekonomike, nga varfëria, papunësia, dhuna dhe konflikti, ndaj bashkëpunimi kundër këtyre dukurive vlerësohet si mjet kryesor në përmirësimin e gjendjes.

 

Më shumë

Jakup Ferri – Heroi i çështjes kombëtare

Ishte viti 1832 kur u lind në Plavë Jakup Ferri. Në rininë e tij mori pjesë aktive në kryengritjet e viteve ’40-’50 kundër pushtuesve osmanë dhe reformave centralizuese të Portës së lartë. Në vitet 1874-1876 Jakup Ferri ishte një nga drejtuesit kryesorë që kundërshtoi inkursionet aneksioniste të Malit të Zi, kështu ai u bë […]

Pse flamuri ynë e ka shqiponjën me dy krena?

Flamuri ynë kombëtar me shenjën e tij dalluese shqiponjën dy krenare ka një histori të lashtë dhe të lavdishme. Si shenjë ushtarake, shqiponja me një kokë njihet në vende të ndryshme qysh nga koha antike, midis tyre dhe në Perandorinë Romake. Në Perandorinë Bizantine, si shenjë e perandorëve, shqiponja u përdor në trajtën […]

Festime në Vlorë për 109-vjetorin e shpalljes së Pavarësisë

Flamuri Kombëtar i Shqipërisë u ngrit sot në Vlorë në 109- vjetorin e shpalljes së Pavarësisë. Qindra banorë të Vlorës dhe të ardhur nga hapësirat shqiptare dolën tek Monumenti i Pavarësisë në Sheshin e Flamurit, që sot ishte i rrethuar nga punimet ndërtimore. Krerët e lartë të shtetit shqiptar; Presidenti, Kryeministri, Kryetarja e Parlamentit […]

109 Vjet Shtet Shqiptar

“Në Vlonë, më 15/28 të vjeshtës së tretë 1328/1912. Pas fjalëvet që tha Z. Kryetari Ismail Kemal Beu, me të cilat tregoi rrezikun e math në të cilin ndodhet sot Shqipëria, të gjithë delegatët me një za venduan që Shqipëria me sot të bahet në vehte, e lirë e e mosvarme.” Gëzuar Pavarësinë! Në […]

  • © 2017 Albanian Profile Të gjitha të drejtat e rezervuara