Filluan përmbytjet – FA dyfishon kapacitetet në ndihmë të banorëve

Ministria e Mbrojtjes dhe Agjencia Kombëtare e Emergjencave Civile po monitorojnë nga afër situatën e krijuar nga reshjet e orëve të fundit.

Me kërkesë të Bashkisë Shkodër, Forcat e Batalionit I të Këmbësorisë janë vënë në dispozicion të Bashkisë Shkodër për transportin dhe evakuimin në rast nevojë në fshatin Obot të njësisë administrative Ana e Malit. Aktualisht ka përmbytje të pjesëshme në njësinë Ana e Malit, në fshatin Kuç, ndërsa janë rritur prurjet e lumit Kir dhe Gjadër. Në një pjesë të sipërfaqeve të tokave ka ujë që shkon deri në 30 cm.

Agjencia e Mbrojtjes Civile bën me dije se janë dyfishuar kapacitetet me forca dhe mjete për t’u ardhur në ndihmë sa më shumë banorëve të zonave të prekura. Në njësinë Ana e Malit janë transportuar rreth 75 banorë.

Gjithashtu, trupat dhe mjetet e Batalionit të Vaut të Dejës janë vënë në dispozicion edhe të Bashkisë Lezhë në zonat ku ka prani të shtuar të ujit.

Të gjithë repartet e Forcave të Armatosura, por sidomos ato të Forcës Tokësore dhe Komandës Mbështetëse janë në gatishmëri të plotë dhe të gatshme për të ndërhyrë në rast nevoje.

Ministria e Mbrojtjes i bën thirrje bashkive të vënë në dispozicion të gjitha burimet për të përballuar situatën në territoret e tyre pasi e kanë detyrim ligjor.

PARASHIKIM PËR PËRMBYTJE Instituti i Gjeoshkencave, Energjisë, Ujit dhe Mjedisit

Nga llogaritjet e IGJEUM, sot dhe nesër nivelet në lumenjtë Drin-Buna dhe Vjosa do të vazhdojnë të jenë të larta por me probleme lokale të përmbytjeve.

Lumenjtë e tjerë do të vazhdojnë të kenë prurje të larta por parashikohen se do të jenë brenda kuotave maksimale të argjinaturave dhe llogariten se do të jenë brenda shtratit natyral. Intensiteti i lartë në disa zona mund të krijojë akoma probleme lokale me përrenjtë dhe lumenjtë e vegjël, përmbytjet urbane dhe rrëshqitje të dherave kryesisht përgjatë ditës së sotme 8 Janar 2021, por përgjatë ditës së nesërme situata do të qetësohet. Ky informacion do të përditësohet nga IGJEUM sipas llogaritjeve më të fundit hidrologjike dhe do të njoftoheni për çdo ndryshim në parashikimin e përmbytjeve.

PARASHIKIMI METEO 

RESHJET  

Sot pasdite (e premte, dt. 08) dhe nesër (e shtunë, dt. 09) priten reshje intensive në qarqet Kukës, Dibër, Lezhë, Durrës dhe Tiranë, ndërsa në qarkun e Dibrës deri lokalisht shumë intensive. Në qarqet e tjerë priten reshje mesatare, ato do të arrijnë deri lokalisht intensive në qarqet Shkodër, Elbasan, Fier, Vlorë dhe Gjirokastër. Reshjet do të shoqërohen me shtrëngata në shumicën e qarqeve (siç tregohet në tabelë, respektivisht për secilin qark). Në veri dhe lindje në lartësitë mbi 600m reshjet do të jenë në formë bore.

TEMPERATURAT

Nesër (e shtunë, dt. 09) temperaturat minimale dhe maksimale të ajrit pritet të arrijnë:

në bregdet: 12 / 17 °C, në vendet e ulëta: 8 / 13 °C, në vendet malore:-1 / 11 °C

ERA

Sot pasdite (e premte, dt. 08) era pritet të fryjë e lehtë deri mesatare, ndërsa në bregdet deri e fortë. Nesër (e shtunë, dt. 09) era pritet të fryjë e lehtë deri mesatare.

• 

  Zogjtë shtegëtarë bllokojnë rrugë Fier – Gjirokastër

• 

  Harta e re sizmike, rritet shkalla e rrezikut, shërben për të ndërtuar në zona të sigurta

• 

  Kojliku Qeros kthehet pas 400 vitesh në Shqipëri

• 

  Ulqin, rrezikohet zhdukja e ishullit turistik në Bunë

• 

  Glasgou, marrëveshja për klimën/ Një fitore e brishtë

• 

  Asnjë e dhënë në 3 vitet e fundit nga bashkia Tiranë për ndotjen e ajrit