e martë 26 tetor 2021
e martë 26 tetor 2021

 

 

Gjykata Supreme që është shkalla e fundit për ankesat e partive politike e vërtetoi se çdo kush që është i dënuar për vepër penale në tri vitet e fundit nuk certifikohet për zgjedhje.

 

Kryetari i Lëvizjes Vetëvendosja Albin Kurti, përfundimisht nuk do të mund të konkurojë për deputet në listën zgjedhore të partisë së tij për zgjedhjet e jashtëzakonshme parlamentare që mbahen me 14 shkurt. Kjo për faktin se Gjykata Supreme e Kosovës, si shkalla e fundit e ankesave të partive politike për këto zgjedhje, e vërtetoi se çdo kush që është i dënuar në tri vitet e fundit me një vendim gjykate të shkallës së prerë nuk do të mund të konkurojë në këto zgjedhje. Lëvizja Vetëvendosja në listën e saj të verifikuar në Këshillin Gjyqësor të Kosovës kishte pesë kandidatë që kishin probleme me ligjin. Dy nga ta sipas Gjykatës Supreme mund të kandidojnë.

 

“Gjykata Supreme e Kosovës e ka pranuar pjesërisht ankesën e lëvizjes Vetëvendosje, për kandidatët Liburn Aliun dhe Labinotë Demi -Murtezin, pasi është konstatuar se Paneli Zgjedhor për Ankesa dhe Parashtresa ka bërë vlerësim të gabuar të afatit 3 vjeçar duke e llogaritur ditën e shpalljes së zgjedhjeve me datë 6 janar 2021 si ditë përfundimtare për të vlerësuar afatin 3 vjeçar për përshtatshmërinë e kandidatëve, në kuptim të dispozitës të theksuar. Gjykata Supreme e Kosovës ka vlerësuar se afati 3 vjeçar duhet të llogaritet duke ju referuar datës së aktgjykimit penal të formës së prerë për secilin kandidat veç e veç e deri në ditën e mbajtjes së zgjedhjeve, që në këtë rast është data 14 shkurt 2021”, thuhet në njoftim të Gjykatës.

 

E kjo nënkupton që tre kandidatë të tjerë të Vetëvendosjes, Albin Kurti që kryeson listën dhe është kandidat për kryeministër, Albulena Haxhiu dhe Bajram Mavriqi në listë për deputet, nuk do të garojnë në këto zgjedhje. Albin Kurti ishte dënuar për shkak të hedhjes së gazit lotësjellës në kuvendin e Kosovës në vitin 2015.

 

Gjykata Supreme po ashtu ndryshoi një vendim të Panelit Zgjedhor për Ankesa dhe Parashtresa për një kandidat për deputet nga radhët e Aleancës për Ardhmërinë e Kosovës, duke urdhëruar KQZ-në që kandidati Shemsedin Dreshaj, të përfshihet në listën e kandidatëve për deputetë. Ndërkaq, Gani Dreshaj, Rrahim Ajeti dhe Shqipe Kastrati nga kjo parti nuk mund të certifikohen, bazuar në këtë vendim. Gjykata po ashtu refuzoi  ankesën e Nismës Socialdemokrate si të pabazë, duke lënë jashtë listës 12 kandidatë për deputetë të dënuar për vepra penale.

 

I menjëhershëm ishte reagimi i zyrtarëve të lëvizjes Vetëvendosja, pasi lideri i tyre Albin Kurti nuk do të mund të garojë në këto zgjedhje. Nënkryetarja e Lëvizjes Vetëvendosje, Arbërie Nagavci, shkroi se “Qeveria Kurti 2 është realitet i ri, i pashmangshëm e i shumëpritur”.

 

“E nderuar që në rrugëtimin politik jam e rreshtuar drejt e në anën e duhur. Me 14 shkurt qytetarët do të tregojnë fuqishëm përkrahjen për Albin Kurtin, e kjo do të jetë jo vetëm përgjigjja më e mirë për institucionet e kapura, por dhe fillimi i punës për shtetin e së drejtës”, shkroi Nagavci në rrejtin e saj social.

 

Moscertifikimi i kandidatëve të partive politike që kanë probleme me ligjin është bërë në bazë të nenit 29 të ligjit për Zgjedhjet e Përgjithshme, i cili përcakton përshtatshmërinë e kandidatëve për t’u certifikuar. Për  zgjedhjet e parakohshme parlamentare që do të mbahen me 14 shkurt, në KQZ kanë aplikuar 28 subjekte politike, prej tyre, 21 parti politike,  2 koalicione dhe 5 iniciativa qytetare.

 

Më shumë

Hovenier: Pa një normalizim të marrëdhënieve Kosovë-Serbi, pa njohje të ndërsjellë, rajoni do të mbetet i bllokuar

Jeffrey M. Hovenier, i emëruari për postin e ambasadorit të ardhshëm amerikan në Kosovë, tha të martën para Komisionit të Senatit për Marrëdhëniet me Jashtë se nëse konfirmohet, ai do të punojë për të çuar përpara mbështetjen e vazhdueshme të Shteteve të Bashkuara për një Kosovë sovrane dhe demokratike. “Kjo mbetet thelbësore për stabilitetin […]

Osmani: Investohuni për ne, e jo për stabilokraci 

Presidentja e Kosovës, Vjosa Osmani, ka kërkuar në Berlin mbështetje më të fortë për Kosovën. Në ditën e dytë të takimeve të saj të mërkurën, ajo pati edhe një prezantim për publikun me ambasadorin, Wolfgang Ischinger.     Në ditën dytë të vizitës së parë zyrtare në Berlin, Vjosa Osmani u takua me ministrin e […]

BE me mision vëzhgues të zgjedhjeve lokale në Kosovë

BE thotë se mbetet i përkushtuar për të mbështetur Kosovën në rrugëtimin e saj evropian. Zgjedhjet lokale në Kosovë mbahen me 17 tetor, ndërsa për shkak të pandemisë ende nuk dihet si do të zhvillohet fushata zgjedhore.     Bashkimi Evropian do të dërgojë në Kosovë një mision për vëzhgimin e zgjedhjeve lokale, që do […]

Përgjaket fushata e zgjedhjeve vendore në Kosovë, dy politikanë të PDK-së vrasin njëri-tjetrin!

Policia e Kosovës bëri të ditur se dy persona kanë humbur jetën në një incident me armë zjarri në qytetin e Pejës, rreth 85 kilometra në perëndim të Prishtinës.   Policia tha se si pasojë e të shtënave tre persona janë plagosur dhe janë dërguar në spitalin Rajonal në Pejë. “Nga ekipi mjekësor […]

  • © 2017 Albanian Profile Të gjitha të drejtat e rezervuara