Japrak me gjethe rrushi – Shije fantastike nga tradita

 Një specialitet fantastik dhe i hershëm i amvisave shqiptare, i trashëguar brez pas brezi e që të përfshin tërësisht me shijen e tij.

 

 

 

Tradita e kuzhinës shqiptare është e pasur me receta të mrekullueshme e përshtatur me produktet e freskëta të çdo stine.

 

E tillë është receta e përgatitjes së japrakëve me gjethe rrushi.

 

Një specialitet fantastik dhe i hershëm i amvisave shqiptare, i trashëguar brez pas brezi e që të përfshin tërësisht me shijen e tij.

 

Japrakët mund të përgatiten si meze për të shoqëruar gjellë, supa apo gatime të tjera, por mund të konsumohen edhe si drekë apo darkë e lehtë shoqëruar me sallata të freskëta të stinës.

 

Më poshtë ju sjellim recetën e përgatitjes së kësaj recete krejt lehtë në shtëpi .

 

Përgatitja e Japrakëve me Gjethe Rrushi:

 

Përbërësit

(Përbërësit më poshtë janë për 4-5 persona)

 

40 copë gjethe rrushi

 

5-6 qepë të njoma

1 filxhan çaji oriz

 

Kripë

 

Një tufë majdanoz

 

Kopër

 

Nenexhik

 

2 filxhanë kafeje vaj ulliri

 

Lëngu i një kokrre limoni

 

Një filxhan çaji me mish të grirë

 

 

Përgatitja

 

Për përgatitjen e kësaj recete, ju udhëzojmë të zgjidhni gjethe rrushi të mëdha dhe të njoma.

 

Si fillim, gjethet e rrushit pastrohen dhe zihen në ujë të valuar për 8-10 minuta.

 

Më pas, kullohen dhe hapen sa janë të nxehta pasi nëse ftohen ngjiten me njera tjetrën.

 

Në vijim, merrni qepët e njoma dhe t’i grini hollë.

 

Kaurdisini në vaj ulliri derisa volumi i tyre të bjerë, më pas shtoni orizin dhe mishin e grirë nëse preferoni, kaurdisini të gjitha bashkë e më pas shtoni kripën, koprën, nenexhikun.

 

Disa amvisa krahas erëzave shtojnë edhe një grusht spinaq të grirë ose lëpjetë.

 

Kaurdisini në disa minuta, largojini nga zjarri dhe nisni përgatitjen e mbushjes së gjetheve të rrushit.

 

Secilës nga gjethet e rrushit, i pritet bishti dhe në mes vendoset një lugë gjelle nga mbushja me oriz.

 

Në fillim mblidhen anët dhe rrotullohen në formë roleje.

 

Vihen në tenxhere ku keni shtruar disa fletë rrushi.

 

I hidhet kripë, një gotë e gjysmë me ujë, vaj ulliri, i vihet një pjatë sipër dhe lihen që të zjejnë derisa japrakët të thithin të gjithë ujin.

 

Pasi të jenë gati, kur shërbehen japrakët spërkaten me lëng limoni dhe nëse preferoni për më shumë shije me disa pika gjalpë të freskët të shkrirë.

 

Më shumë

• 

  Japrak me gjethe rrushi – Shije fantastike nga tradita

• 

  Ëmbëlsira e Pranverës – Receta e Vjetër e Traditës Arbëreshe

• 

  Pulë me lëng me miell misri – një recetë e ngrohtë plot shije dhe vlera

• 

  Petulla me nenexhik, djathë e hudhra – për të kënaqur nepsin dhe oreksin

• 

  Koha për të përgatitur dollma–japrak, me lakër të bardhë – më të shijshmet e Traditës Shqiptare

• 

  Jahni me presh dhe mish viçi – receta dimërore