Koalicioni i Maduros fiton zgjedhjet në Venezuelë

Partia e presidentit Nicolas Maduro dhe aleatët e tij i fituan zgjedhjet parlamentare në Venezuelë, tregojnë rezultatet e pjesshme.

Zgjedhjet, që u mbajtën të dielën, u bojkotuan nga partitë kryesore opozitare.

Me mbi 80 për qind të votave të numëruara, Këshilli Kombëtar Zgjedhor tha se koalicioni i Maduros ka fituar 67.6 për qind të tyre.

Bojkotimi i zgjedhjeve është udhëhequr nga lideri i opozitës, Juan Guaido, i cili, tash e dy vjet, është në luftë për pushtet me Maduron.

Shtetet e Bashkuara dhe mbi 50 vende të tjera e njohin Guaidon si udhëheqës legjitim të Venezuelës.

Sekretari amerikan i Shtetit, Mike Pompeo, i cilësoi zgjedhjet e së dielës si “mashtrim”.

“Rezultatet e shpallura nga regjimi i paligjshëm i Maduros nuk do të pasqyrojnë vullnetin e popullit të Venezuelës”, shkroi Pompeo në Twitter.

Pasi votoi të dielën, Maduro tha se zgjedhjet do të shënojnë fillimin e një epoke të rimëkëmbjes për Venezuelën.

Nën qeverisjen e Maduros, ekonomia është dobësuar dhe mungesat e ushqimeve dhe ilaçeve janë rritur.

Sipas Agjencisë së Kombeve të Bashkuara për Refugjatë (UNHCR), aktualisht janë rreth 4.5 milionë refugjatë dhe migrantë nga Venezuela në të gjithë botën. REL

• 

  Shtypen protestat në Kubë, SHBA-të kritikojnë regjimin

• 

  Në zgjedhjet më të përgjakshme të botës, koka të prera hidhen si kërcënim në qendrat e votimit

• 

  Meksikë, në 5 vitet e fundit janë vrarë 17.715 gra

• 

  Kuba hap ekonominë për bizneset private

• 

  Koalicioni i Maduros fiton zgjedhjet në Venezuelë

• 

  Kombet e Bashkuara e akuzojnë Venezuelën për “krime kundër njerëzimit”