e diel 24 tetor 2021
e diel 24 tetor 2021

 

Kuvendi i Republikës së Kosovës, me kërkesë të kryeministrit, është mbledhur sonte në seancë të jashtëzakonshme, për të shqyrtuar Propozim-Vendimin e Qeverisë për dërgimin e Kontingjentit të Forcës së Sigurisë së Kosovës jashtë vendit.

 

Pas vendimit të Kuvendit për shmangie nga afatet procedurale për shqyrtimin e kësaj pike, propozim-vendimin para deputetëve e paraqiti dhe arsyetoi kryeministri Avdullah Hoti, duke e konsideruar atë konfirmim të besimit që kanë aleatët ndaj Kosovës dhe të orientimit euro-atlantik të saj.

 

Kryeministri Hoti tha se me këtë vendim Kosova merr përgjegjësinë për paqen globale në botë. Ai tha se përtej simbolikës, misioni i parë i pjesëtarëve të FSK-së është i rëndësishëm sepse bëhet në bashkëpunim të plotë me Gardën e Ajovës që ka dhënë mbështetje të madhe për Kosovën.

 

“Populli i Kosovës si pak popuj në botë e kupton rëndësinë e misioneve paqeruajtëse. Me këtë vendim ne sot renditemi krah partnerëve tanë për të siguruar paqen në botë”, theksoi kryeministri Hoti.

 

Fatmire Mulhaxha Kollçaku, në emër të Komisionit për Çështje të Sigurisë dhe të Mbrojtjes, paraqiti rekomandimin për miratimin e këtij propozim-vendimi.

 

Seanca vijoi punimet me diskutimet e përfaqësuesve të grupeve parlamentare. Në emër të GP të VV-së, deputeti Liburn Aliu i dha mbështetje propozim-vendimit, duke adresuar njëkohësisht kritika ndaj qeverisë, për sjelljen e këtij propozimi dhe thirrjen e kësaj seance në momentet e fundit.

 

Kryetari i GP të LDK-së, Arben Gashi, ditën e sotme e konsideroi të veçantë, ndërsa propozim-vendimit të qeverisë, për të dërguar trupa ushtarake në misione paqeruajtëse jashtë vendit, i dha mbështetje të parezervë.

 

Duke folur në emër të GP të PDK-së, deputetja Ganimete Musliu shtroi një varg pyetjesh lidhur me vendimin, siç tha ajo, të vonuar të qeverisë përkitazi me këtë çështje të rëndësishme, ndërsa konfirmoi mbështetjen e grupit parlamentar që përfaqëson.

 

Kryetari i GP të AAK-së, Daut Haradinaj, vlerësoi lart mundësinë që trupat ushtarake të Kosovës do të jenë përkrah pjesëtarëve të ushtrive partnere dhe më të fuqishme në botë, duke konfirmuar gjithashtu mbështetjen e grupit të tij parlamentar.

 

Po ashtu, votat e GP Nisma-AKR-6+, i konfirmoi edhe kryetari i këtij grupi, Endrit Shala, duke shtuar se ndihet i emocionuar por edhe krenar.

 

Ministri i Mbrojtjes, Anton Quni, falënderoj të gjithë ata që, siç tha ai, po kontribuojnë në forcimin e partneritetit me SHBA-të, ndërsa dha edhe një sërë sqarimesh në çështje të ngritura nga deputetët.

 

Kryetarja e Kuvendit, dr. Vjosa Osmani, tha se ky votim është i natyrës historike, por gjithashtu, siç tha ajo, është edhe krenari e dyfishtë, së pari me djemtë dhe vajzat e FSK-së, të cilët kanë arritur këtu si rezultat i shumë brezave, por gjithashtu është edhe krenari, për shkak se kjo arritje po bëhet së bashku me Shtetet e Bashkuara të Amerikës.

 

“Jam vërtet e lumtur që si Kuvend i Republikës së Kosovës po e përmbyllim këtë legjislaturë me një vendim të tillë dhe po ashtu jam e bindur se ky është vetëm fillimi për sukseset e ushtrisë sonë”, theksoi kryetarja Osmani.

 

Pas shterjes së diskutimeve, Kuvendi hyri në procedurën e votimit.

 

Kështu, me 92 vota për, asnjë kundër dhe asnjë abstenim, Kuvendi i Republikës së Kosovës vendosi dërgimin kontingjentit të FSK-së jashtë vendit, me mision ofrimin e mbështetjes për stabilitet rajonal dhe operacione paqeruajtëse, në regjionin e komandës qendrore amerikane. Vendimi i dërgohet U. D. Presidentes së Republikës së Kosovës për dhënien e autorizimit final për dërgimin e kontingjentit të FSK-së.

 

Në përmbyllje të seancës, kryetarja Osmani, në emër të të gjithë deputetëve u uroi shërbim të shpejtë të gjithë të lënduarve nga shpërthimi i sotëm në Ferizaj.

Më shumë

Hovenier: Pa një normalizim të marrëdhënieve Kosovë-Serbi, pa njohje të ndërsjellë, rajoni do të mbetet i bllokuar

Jeffrey M. Hovenier, i emëruari për postin e ambasadorit të ardhshëm amerikan në Kosovë, tha të martën para Komisionit të Senatit për Marrëdhëniet me Jashtë se nëse konfirmohet, ai do të punojë për të çuar përpara mbështetjen e vazhdueshme të Shteteve të Bashkuara për një Kosovë sovrane dhe demokratike. “Kjo mbetet thelbësore për stabilitetin […]

Osmani: Investohuni për ne, e jo për stabilokraci 

Presidentja e Kosovës, Vjosa Osmani, ka kërkuar në Berlin mbështetje më të fortë për Kosovën. Në ditën e dytë të takimeve të saj të mërkurën, ajo pati edhe një prezantim për publikun me ambasadorin, Wolfgang Ischinger.     Në ditën dytë të vizitës së parë zyrtare në Berlin, Vjosa Osmani u takua me ministrin e […]

BE me mision vëzhgues të zgjedhjeve lokale në Kosovë

BE thotë se mbetet i përkushtuar për të mbështetur Kosovën në rrugëtimin e saj evropian. Zgjedhjet lokale në Kosovë mbahen me 17 tetor, ndërsa për shkak të pandemisë ende nuk dihet si do të zhvillohet fushata zgjedhore.     Bashkimi Evropian do të dërgojë në Kosovë një mision për vëzhgimin e zgjedhjeve lokale, që do […]

Përgjaket fushata e zgjedhjeve vendore në Kosovë, dy politikanë të PDK-së vrasin njëri-tjetrin!

Policia e Kosovës bëri të ditur se dy persona kanë humbur jetën në një incident me armë zjarri në qytetin e Pejës, rreth 85 kilometra në perëndim të Prishtinës.   Policia tha se si pasojë e të shtënave tre persona janë plagosur dhe janë dërguar në spitalin Rajonal në Pejë. “Nga ekipi mjekësor […]

  • © 2017 Albanian Profile Të gjitha të drejtat e rezervuara