“Makina e së vërtetës” për kandidatët për në BKH

Nga sot policia shqiptare ka në pajisjet e saj edhe makinat e së vërtetës ose ndryshe poligrafët. Në Ministrinë e Brendshme janë certifikuar sot 5 poligrafët e parë të Shërbimit për Çështjet e Brendshme dhe Ankesat që do të marrë në testim edhe kandidatët për Byronë Kombëtare të Hetimit, BKH, ose ndryshe FBI-ja shqiptare.

Ambasadorja amerikane Yuri Kim e pranishme në këtë ceremoni përsëriti angazhimin e Shteteve të Bashkuara për të mbështetur autoritetet në luftën ndaj korrupsionit në sistemin e Drejtësisë penale.

“Jam shumë e kënaqur që jam këtu sot për të shënuar suksesin e këtyre pesë studentëve të përkushtuar të cilët iu kushtuan me zell përfundimit të 400 orëve mësimi sfidues teorik dhe praktik në shkencën e poligrafisë. Ata kanë studiuar fiziologji njerëzore, psikologji, teknika të intervistimit dhe interpretim të rezultateve të testit. Instruktorja e tyre ka vlerësuar në mënyrë të përsëritur përkushtimin dhe disiplinën e tyre gjatë gjithë kursit.

Do të doja të merrja një çast për të falënderuar edhe instruktoren e tyre, Zj. Lori Kosiarek, përkushtimi dhe profesionalizmi i së cilës ka qenë shembullor. Ajo e ka bërë këtë kurs dhe këta studentë qendrën e jetës së saj që nga shtatori i vitit të kaluar dhe do të vazhdojë të punojë me ta ndërsa vënë në praktikë aftësitë e reja të përftuara prej tyre. Lori, ne vërtetë e vlerësojmë përkushtimin tënd për këtë projekt. Pavarësisht sa i rëndësishëm është ky moment personalisht për studentët, Shtetet e Bashkuara i japin një rëndësi edhe më të madhe domethënies së trajnimit i tyre për luftën kundër korrupsionit në Shqipëri. Ligji për SPAK kërkon që të gjithë punonjësit e BKH-së t’i nënshtrohen ekzaminimit me poligraf para punësimit.

Këta ekzaminues dhe pajisja e dhurar nga Shtetet e Bashkuara, sigurojnë aftësinë për ta zbatuar atë ligj. Ato janë një tjetër armë në arsenalin e qeverisë shqiptare për të zbuluar dhe larguar individët e korruptuar nga radhët e ligjzbatuesve. Përveç të festuarit për diplomimin e ekzaminuesve, jemi sot këtu për të përuruar themelimin e njësisë së poligrafit brenda Shërbimit për Çështjet e Brendshme dhe Ankesat. Njësia do të fillojë të kryejë kontrollin e kandidatëve për Drejtor të Byrosë Kombëtare të Hetimit më vonë gjatë kësaj jave — një hap vërtetë domethënës për ta bërë BKH-në realitet. Drejtor Rrumbullaku, tanimë i takon organizatës suaj të sigurojë përdorimin e efektshëm dhe efikas të kësaj njësie në një mënyrë të paanshme që respekton të drejtat e njeriut.

Shtetet e Bashkuara do të vazhdojnë t’ju ndihmojnë në këtë detyrë dhe në funksione të tjera vendimtare, gjatë vitit të ardhshëm. Sikurse me përparimin në fushat e tjera të reformës në drejtësi, Shtetet e Bashkuara qëndrojnë vendosmërisht me Qeverinë e Shqipërisë, ndërsa largon korrupsionin nga sistemi i drejtësisë penale. Kjo punë duhet të vazhdojë në të gjithë spektrin e gjerë të sistemit të drejtësisë.”, deklaroi ambasadorja Kim.

• 

  72 vjetori i krijimit të Arkivit Qendror Shtetëror

• 

  Akademia e Shkencave po konkretizon vepra të mëdha albanologjike

• 

  Akademia e Shkencave: Nis puna tri vepra madhore albanologjike; Enciklopedia shqiptare, Fjalori i madh i shqipes dhe Historia e shqiptarëve

• 

  Gjykata Kushtetuese rinis punën pas bllokimit disa vjeçar

• 

  Nis punën Gjykata Kushtetuese

• 

  Gjykata dhe SPAK kundër OFL për sekuestrimin e pasurive