Momente të vështirë për politikën e Pekinit në Europë

Pas vizitës historike të Ministrit amerikan të Shëndetësisë, kohët e fundit Taipein (Taiwanin) e vizitoi edhe Kryetari i Senatit të Çekisë Milos Vystrcil, personaliteti i dytë çek, pas Vaclav Havel më 2004, që ka vizituar këtë vend deri më tani.

Kjo vizitë, edhe pse nuk bart elementët e një qëndrimi kompleksiv europian, ka një domethënie historike të veçantë: vendet e Europës e njohin de facto Taivanin si shtet më vete, pavarësisht pretendimeve të Kinës Popullore, sipas së cilës, ishulli është “pjesë e pandashme” e saj. Kreu i senatit çek, perifrazoi Kenedin e vitit 1963 në Berlin (“Ich bin ein Berliner”), kur deklaroi para parlamentit taivanez “unë jam tajvanez”.

Vizita e personalitetit të lartë çek në Taipei u krye paralelisht me vizitën e Ministrit të Punëve të Jashtëme të Republikës Popullore të Kinës, Wang Yi, në disa vende europianë dhe jo vetëm kaq, por e eklipsoi krejtësisht atë, aq sa këtij të fundit iu desh të bënte deklarata kërcënuese ndaj kreut të senatit çek. Ndaj kësaj vizite, kishin shprehur rezervat e tyre edhe Kryeministri si dhe Presidenti i Çekisë, të cilët janë të njohur në Europë për qëndrimet e tyre filoruse dhe filokineze, por kryetari filoperëndimor i senatit, i mbështetur edhe nga Ministri i Jashtëm i këtij vendi, e organizoi atë me sukses. Kinës iu kërkua zyrtarisht të përmbahet në deklaratat e saj dhe ambasadori kinez në Pragë u thirr nga Ministria e Jashtëme e këtij vendi në shenjë proteste ndaj deklaratave të Pekinit ndaj personalitetit çek. Për më tej, reagimet e ashpra dhe të pasens të Pekinit shërbyen si elementë që riformuluan qëndrimet antikineze të një opinioni të gjerë publik në Çeki dhe patën jehonë edhe në vende të tjerë të BE-së.

Për politikën e jashtëme europiane të Pekinit duket se po vijnë momente të vështirë.

• 

  Rusia kërkon garanci të qarta sigurie nga Perëndimi

• 

  Bombarduesit rusë patrullojnë mbi kufijtë e Bjellorusisë

• 

  Të zemëruar me Abbasin, palestinezët votuan në zgjedhje komunale

• 

  Çfarë fshihet pas tensioneve Rusi-Ukrainë?

• 

  Biden dhe Putin nuk arrijnë marrëveshje për krizën në Ukrainë

• 

  “Do të fluturoj sërish”: Frika nga talibanët ndërpret ëndrrën e pilotes së parë afgane