Nga Shqipëria dhe Kosova, dy pilotet ushtarake që bashkojnë SHBA dhe Shqipërinë në “Defender 2021”

Valdete Mehanja dhe Armela Murati janë dy pilotet që duket i kanë dhënë kuptimin e vërtetë qëlllimit të stërvitjes më të rëndësishme që zhvillohet në Europë, “Defender 2021”, ndërveprimit mes aleatëve të NATO-s.

Nëntoger Valdete Mehanja ka lindur në Kosovë, por prej vitesh ajo është pilote helikopteri me Regjimentin e Aviacionit 1-131, në Gardën Kombëtare e Alabamës. Ajo ka ardhur në Shqipëri si pjesë e trupave amerikane që po marrin pjesë në stërvitjen ‘Defender ‘21”.

Në bazën ajrore të Farkës ajo është takuar me të vetmen vajzë të kursit të pilotit për helikopterët ushtarakë, nëntoger Armela Muratin. Armela i është bashkuar prej një viti Forcave të Armatosura shqiptare dhe thotë se ka zgjedhur rastësisht këtë kurs, pasi u emërua në Forcën Ajrore.

Të dyja vajzat kanë ndarë mes tyre sekretet e profesionit, por edhe kanë bashkuar ambicjen për të qenë të barabarta mes burrash në këtë profesion.

Nëntoger Mehanja thotë se për të ishte befasi të vinte në Shqipëri si ushtare amerikane, pasi nuk kishte qenë asnjëherë më parë. E pyetur përse kishte zgjedhur t’i bashkohej ushtrisë amerikane, ajo ka një arsye të fortë: “I jam bashkuar ushtrisë amerikane, sepse kjo ushtri, veçanërisht Amerika e ka ndihmuar shumë popullin shqiptar, sidomos Kosovën. Dhe e ndiej veten si në borxh”.

Nëntoger Mehanja thotë se më herët ka qenë pilote civile. Ndërsa nëntoger Armela Murati, teksa dëgjon nga kolegia amerikane këshillat në gjuhën shqipe, thotë se ka marrë mbështetje dhe kurajo në një mjedis ku mbizotërojnë burrat. “Nuk kisha synim të bëhesha pilote. Thjesht doja t’i shërbeja vendit tim, fati deshi që unë t’i bashkohem Forcës Ajrore dhe tashmë jam edhe kursante. Presioni është goxha i madh, por unë kam ardhur me synime të qarta dhe dua që këtë hap që kam hedhur ta çoj deri në fund”, shprehet nëntoger Murati.

E këtë ambicie të vajzës së re nga Shqipëria e inkurajon nëntoger Valdete Mehanja, e cila ka kaluar 11 vjet për të arritur deri këtu. “Mos u dorëzo, se gjithçka ja vlen!”, shprehet shqiptarja që përfaqëson SHBA në “Defender 2021”. ATSH

• 

  Nga Shqipëria dhe Kosova, dy pilotet ushtarake që bashkojnë SHBA dhe Shqipërinë në “Defender 2021”

• 

  Zhvillohet Dita e Hapur e Stërvitjes “Defender Europe 21” në sheshin “Nënë Tereza”

• 

  “Defender Europe 21” këtë të diel zbarkon në zemër të Tiranës

• 

  Pajisjet ushtarake të “Defender Europe 2021” ekspozohen për qytetarët e Vlorës

• 

  Stërvitje e përbashkët shqiptaro-amerikane

• 

  Mbërrijnë në Tiranë 267 ushtarakë amerikanë, kapitenia Demores nxit gratë shqiptare të bëhen pjesë e ushtrisë