e hënë 26 korrik 2021
e hënë 26 korrik 2021

 

Parlamenti zgjodhi drejtuesin e ri të Autoritetit të Mediave Audiovizive, pavarësisht shqetësimeve të shprehura nga institucionet ndërkombëtare. Në krye të këtij institucioni u votua zonja Armela Krasniqi, drejtuesja aktuale a agjencisë shtetërore të lajmeve ATSH dhe ish zëdhënëse e Partisë Socialiste. Delegacioni i Bashkimit Europian kishte ftuar autoritetet që ta shtynin vendimin për legjislaturën e ardhshme të parlamentit të ri, duke theksuar se është e rëndësishme që të mos ketë dyshime mbi natyrën jopartiake, profesionale dhe pluraliste të punës së AMA-s. Po ashtu dhe OSBE-ja kishte vënë theksin te nevoja e një procesi gjithëpërfshirës dhe transparent.

 

Votimi në seancën e fundit të këtij parlamenti, për zgjedhjen e drejtuesit të ri të Autoritetit të Mediave Audiovizive, u parapri nga disa deklarata të institucioneve ndërkombëtare, të cilat shprehnin shqetësim rreth kësaj vendimmarrjeje.

 

Delegacioni i Bashkimit Europian në Tiranë, vuri në dukje se “autoritetet rregullatore të mediave duhet të punojnë në mënyrë të paanshme, transparente dhe me një legjitimitet të njohur nga të gjithë”. Deklarata e BE-së theksonte se “Bashkimi Evropian ka rishikuar Direktivën e Shërbimeve të Mediave Audiovizive dhe ka paraqitur kërkesa të reja për pavarësi për rregullatorët kombëtarë të mediave, përfshirë detyrimin për të vendosur procedura transparente dhe të pavarura për emërimin dhe shkarkimin e kryetarit dhe anëtarëve të bordit të këtyre autoriteteve”, duke i kujtuar Shqipërisë se “ky legjislacion është pjesë e “acquis” të BE-së të cilin ajo duhet të përshtasë”.

 

Në deklaratën e Delegacionit të BE-së ftoheshin “autoritetet të marrin në konsideratë të vazhdojnë me këtë emërim gjatë legjislaturës së ardhshme në shtator, së bashku me emërimin e anëtarëve të bordit të Autoritetit, si mënyra më e mirë për të arritur konsensusin dhe legjitimitetin e pranuar gjerësisht”, duke theksuar se “është e rëndësishme që të mos ketë dyshime mbi natyrën jopartiake, profesionale dhe pluraliste të punës së AMA-s”.

 

Shqetësimit të Bashkimit Europian iu bashkangjit dhe prania e OSBE-së në Shqipëri “duke theksuar nevojën për një organ të pavarur të rregullimit të medias. Ne nënvizojmë rëndësinë e një procesi gjithëpërfshirës dhe transparent për emërimin e kryetarit dhe anëtarëve të rinj të AMA-s, për të garantuar që AMA ta përmbushë më së miri misionin e saj të ndjeshëm”, theksonte në qëndrimin e saj OSBE-ja.

 

Por këto shqetësime nuk u morën në konsideratë nga shumica, qëndrimi i së cilës u bë i qartë që para votimit nga kreu i grupit socialist Taulant Balla, sipas të cilit “është detyrë e Kuvendit të Shqipërisë që të garantojë vijimësinë e ushtrimit të detyrës së tyre çdo institucion që varet prej tij. Ne kemi miratuar një rezolutë për AMA-n para pak ditësh. Procesi për zgjedhjen e kreut të këtij institucioni është zhvilluar prej shumë javësh, sipas të gjitha procedurave parlamentare. Po kjo procedurë parlamentare e detyron Kuvendin, që vendimin e Komisionit ta shqyrtojë sot dhe ta votojë”.

 

Në fund të votimit rezultoi se përballë juristes Alketa Dibra, kandidatja tjetër Armela Krasniqi doli fituese me 83 vota në favor. Zonja Krasniqi, drejtuesja aktuale e agjencisë shtetërore të lajmeve, ATSH, ka qenë me herët zëdhënëse e Partisë Socialiste dhe drejtuese e zyrës së shtypit të Kryeministrit Edi Rama.

 

Pikërisht e kaluara e saj bëri që dhe opozita të ngrinte zërin duke folur sipas saj për një kapje politike të AMA-s.

 

Pak ditë më parë dhe Rrjeti i Gazetarëve të Sigurt (Safe Journalists) i cili bashkon shoqatat e gazetarëve në vendet e Ballkanit u shpreh gjithashtu “i shqetësuar për pavarësinë dhe profesionalizmin e dy kandidaturave për kryetarin e AMA-s. Të dy kriteret janë thelbësore për lirinë e medias dhe për proceset demokratike në Shqipëri”. Në letrën dërguar kryetarit të Parlamentit Gramoz Ruçi viheshin në dukje dhe “mangësitë në procedurën e përzgjedhjes së tyre, duke marrë parasysh që procesi është formal pa konkurrencë kuptimplotë dhe i kryer me nxitim brenda parlamentit aktual, mandati i të cilit skadon së shpejti, njëkohësisht pa prezencën një opozite të mirëfilltë”.

 

AMA u vu në qendër të vëmendjes kur e ashtuquajtura Paketa Antishpifje, e propozuar nga Qeveria, i jepte këtij institucioni kompetenca të gjera kontrolli mbi mediat online. Pavarësisht kritikave ndërkombëtare, socialistët vijuan gjatë vitit të kaluar me miratimin, për t’u tërhequr pasi çështja i kaloi Komisionit të Venecias. Ky i fundit, në Opinionin e tij sugjeronte rishikimin e plotë të Paketës, pasi, ndryshimet e propozuara vlerësoheshin se mund t’i bënin më shumë dëme se sa të mira, lirisë së shprehjes në Shqipëri.

 

Që nga ajo kohë, autoritetet nuk kanë ndërmarrë asnjë hap tjetër. Në një deklaratë të tyre, Reporterët pa kufij, ngrinin dje shqetësimin për situatën e krijuar, kur ligji zyrtarisht nuk është tërhequr por gjendet ende në parlament, ndërsa autoritetet nuk kanë bërë ende të qartë se si mendojnë të veprojnë.

 

Më shumë

38 kandidatë për kryetar bashkie në 2019 nuk dorëzuan formularin e Dekriminalizimit

Ilirjan Celibashi, kreu i Komisionit Qëndror të Zgjedhjeve prezantoi në Kuvend raportin e veprimtarisë së punës së institucionit që drejton për vitin 2020.   Celibashi tha se 38 kandidatë të subjekteve politike nuk pranuan të dorëzojnë formularin e Dekriminalizimit pranë KQZ në zgjedhjet e 30 Qershorit të vitit 2019.   Kryekomisioneri u ndal dhe […]

“Vatra” në mbrojtje të Berishës: Vendim i marrë nën trysninë e lobistëve

Federata Pan-Shqiptare e Amerikës, Vatra, reagoi për vendimin e Departamentit të Shtetit për të shpallur “non grata” ish-kryeministrin Sali Berisha.   Në një deklaratë të shpërndarë, Vatra, ndërsa shpreh besimin tek institucionet amerikane, thekson se vendimi më shumë sesa i bazuar mbi parimet amerikane, është marrë nën trysninë e disa grupeve lobiste për […]

Gramoz Ruçi tërhiqet pas 30 vitesh nga jeta politike

Kryetari i Parlamentit dhe një nga figurat historike të Partisë Socialiste, Gramoz Ruçi njoftoi të shtunën tërheqjen e tij nga politika. Ai shfrytëzoi një kongres të Jashtëzakonshëm të PS, të organizuar në ditëlindjen e 30-të të kësaj force politike, për të bërë të ditur vendimin e tij.   “Kam zgjedhur ditën e sotme, se […]

Basha rikonfirmohet bindshëm në krye të PD

Kryetari aktual Lulzim Basha, u rikonfirmua për një mandat të tretë në drejtimin e Partisë Demokratike, pas votimit të zhvilluar të dielën në të gjithë degët e kësaj force politike. Ndonëse rezultati nuk është konfirmuar ende zyrtarisht, të dhënat paraprake flasin për një fitore bindëse të zotit Basha me afro 81 përqind të votive. […]

  • © 2017 Albanian Profile Të gjitha të drejtat e rezervuara