Presidenti i Kroacisë në Kosovë: Motivet e ‘Open Balkan’ duhet të bëhen të qarta

Presidenti i Kroacisë Zoran Milanoviq, tha se nëse Kosova nuk përfshihet në mënyrë të barabartë në nismën “Open Balkan”, atëherë kjo nuk ka kuptim.

Presidenti i Kroacisë Zoran Milanoviç tha gjatë një vizite zyrtare që zhvilloi në Kosovëse kjo nismë duhet t’i trajtojë të gjitha vendet në mënyrë të barabartë.

“Në këto iniciativa duhet matur dhe kalkuluar çdo gjë, e jo të shkohet me kokë pas muri. Nëse kjo iniciativë nuk e mbulon Kosovën në mënyrë të barabartë, atëherë kjo iniciativë është pa lidhje”, u shpreh presidenti kroat Milanviç. Ai tha se duhet të bëhen të qarta motivet e iniciativës së themeluar nga Shqipëria, Serbia dhe Maqedonia e Veriut.

Motivet e nismës duhet të bëhen të qarta

“Nuk na prek neve në mënyrë direkte, por nëse iniciativa ka qëllime të mira atëherë duhet ta marrim parasysh, por me kusht që të gjitha shtetet të trajtohen njëjtë, në të kundërtën atëherë duhet pyetur se cilat janë motivet e saj?”, u shpreh presidenti kroat Milanoviç.

Dy ditë pas takimit të fundit të “Open Balkan” që u mbajt në Tiranë presidentja e Kosovës Vjosa Osmani, duke dëgjuar edhe deklaratën e presidentit kroat që e priti për vizitë në Kosovë, tha se “iniciativa e cila nisi si “Minishengen” në Novi Sad ka shkelur parimin e gjithpërfshirjes dhe trajtimin e barabartë rajonal”. Osmani tha se “Kosova insiston që bashkëpunimi rajonal të vazhdojë në kornizën e procesit të Berlinit”. Ndërsa, sipas saj, “përderisa Serbia e udhëheq iniciativën “Open Balkan” dhe nuk e njeh Kosovën s’mund të pritet nga Vuçiçi që të ketë qëllime të mira”.

Osmani: Vuçiçi nuk mund të ketë qëllime të mira

“Përderisa Serbia ka rol kyç në këtë iniciativë dhe nuk e njeh Kosovën ne nuk mund të presim nga presidenti Vuçiç që ka qëllime të mira për Kosovën sepse vet militarizimi i Serbisë që po ndodh tregon se ka tendenca destablizuese në rajon. Kur Serbia heq dorë nga tendenca destablizuese ndaj rajonit dhe në momentin që e njeh Kosovën atëherë dikush mund ta merr seriozisht deklaratën e Vuçiçit se i intereson bashkëpunimi rajonal”, u shpreh presidentja Vjosa Osmani.

Dy ditë më parë takimi i “Open Balkan”, u mbajt në Tiranë me pjesëmarrjen e Shqipërisë si nikoqire, Serbisë dhe Maqedonisë së Veriut. Kryeministri shqiptar Edi Rama, ftesën për t’u përfshirë në këtë nismë ua drejtoi edhe tri vendeve të rajonit, Malit të Zi, Bosnjës dhe Hercegovinës dhe Kosovës duke përsëritur se “Open Balkan është një nismë gjithëpërfshirëse”.

• 

  Tërhiqet plani për minierën e litiumit në Serbi

• 

  Presidentja Osmani kërkon shtimin e angazhimit amerikan dhe evropian kundër ndikimit rus

• 

  Opozita në Mal të Zi heq dorë nga rrëzimi i qeverisë

• 

  Danimarka pret të marrë me qira 300 qeli burgu në Kosovë

• 

  Britania e Madhe e shqetësuar me tensionet në Ballkanin Perëndimor

• 

  Serbia hapi katër kapituj në negociatat me BE-në