Prodhonin kanabis në Spanjë për tregun europian, arrestohen 107 persona, shumica shqiptarë

Njëqindeshtatë persona, kryesisht shqiptarë janë arrestuar gjatë një dite aksioni më 13 korrik që përfshiu autoritetet e zbatimit të ligjit në Spanjë, Gjermani dhe Shqipëri, duke çmontuar një rrjet të organizuar kriminal të trafikimit të drogës.

Grupi kriminal besohet se po menaxhonte plantacionet e kanabisit në Spanjë ku ata kultivonin dhe përpunonin marihuanën, para se të transferohej në vendet e tjera evropiane për shpërndarje të mëtejshme.

Në ditën e aksionit, rreth 400 policë në terren kryen bastisje të njëkohshme në 42 vende të ndryshme në Spanjë.

Disa kërkime shtesë u kryen disa ditë më vonë. Në konferencën për media të mbajtur të mërkurën në Spanjë, ishte i pranishëm edhe drejtori i përgjithshëm i Policisë së Shqipërisë Ardi Veliu, i cili tha se Policia e Shqipërisë ka treguar se është “një partner i besueshëm për të gjitha agjencitë e zbatimit të ligjit”.

“Pas një viti pune të gjatë hetimor, u bë i mundur finalizimi i këtij operacioni të madh ndërkombëtar, ku policia shqiptare ka qenë kontribuese direkte, për shkëmbimin e informacionit për të gjithë shtetasit shqiptarë të përfshirë dhe në veprime konkrete me oficerë të Policisë Shqiptare”, tha Veliu.

Në anën tjetër, shefi i Divizionit të Hetimeve Kriminale të Skuadrës së Lëvizshme të Policisë Spanjolle, Ramón Chacón, duke dhënë detaje për aksionin, tha se shqiptarët “janë sekserët e kanabisit të Spanjë”.

“Operacioni zgjati 1 vit dhe është operacioni më i madh kundër mafies shqiptare. Është e rëndësishme sepse, normalisht kemi shumë plantacione kanabisi. Ne jemi eksportues në Europë, kërkesa nga Gjermania është në rritje. Shqiptarët që vijnë këtu janë sekserët e marijuanës, sepse kontaktojnë mafien spanjolle që merret me ngritjen e shtëpive të barit dhe më pas gjejnë blerësit. Prandaj është e rëndësishme që të bashkëpunojmë me policinë shqiptare”, tha Chacón.

Në një komunikatë për media të lëshuar nga Europol, ndër tjerash thuhet se ky grup kriminal i organizuar me bazë klani ishte i strukturuar në mënyrë hierarkike, me degë që vepronin ndërkombëtarisht. Disa nga anëtarët e saj të arrestuar kanë një histori të trafikut të drogës në vende të ndryshme.

“Europol e mbështeti këtë hetim duke siguruar ekspertizë të përshtatur dhe mbështetje të gjerë analize dhe duke lehtësuar shkëmbimin e informacionit përmes kanaleve të tij të sigurta. Në ditën e aksionit, një post komandues virtual u krijua nga Europol për të siguruar koordinim të përsosur midis të gjitha autoriteteve të përfshira”, thuhet në komunikatë.

Gjatë këtij megaoperacioni u kryen kontrolle në 51 ambiente, nga të cilat 23 plantacione/shtëpi bari, u asgjësuan rreth 25.000 bimë narkotike kanabis, u sekuestruan 938 kg boçe kanabisi, një detonator, dy armë zjarri, tri mjete luksoze, një bllokues valësh dhe 68.760 euro.

Fjala e Drejtorit të Përgjithshëm të Policisë së Shtetit, Drejtues Madhor Ardi Veliu, në konferencën për shtyp në Madrid

“Mirëdita të gjithëve,

Siç e përmendën kolegët parafolës, për gati një vit pune të gjatë investiguese dhe hetimore tashmë është bërë e mundur finalizimi i këtij operacioni të madh ndërkombëtar dhe Policia shqiptare  si pjesë përbërëse dhe kontribuuese direkte në finalizimin e këtij operacioni,  ka qenë e përfshirë që në momentet e para duke ndihmuar dhe kontribuar me shkëmbimin e informacionit për të gjithë shtetasit shqiptarë të përfshirë dhe të identifikuar duke iu mundësuar kolegëve spanjollë, vazhdimin e mëtejshëm dhe thellimin e hetimeve, ashtu  edhe në veprimet konkrete ditët e vazhdimit dhe finalizimit të operacionit  me oficerë të Policisë nga Shqipëria.

Kjo vërteton edhe njëherë që Policia shqiptare tashmë është e pjekur jo vetëm profesionalisht, por është dhe një partner i besueshëm për të gjitha agjencitë e zbatimit të ligjit, duke bërë të mundur goditjen e krimit të organizuar në të gjitha vendet dhe aty ku ka përfshirje të shtetasve shqiptarë.

Ne nuk do të mjaftohemi vetëm me ndalimin e operacionit n në këtë start por do të vazhdojmë në vendin tonë  duke identifikuar dhe investiguar të gjitha pronat të cilat mund të kenë ardhur si rezultat i aktivitetit kriminal për të gjithë shtetasit e përfshirë, sepse duke e goditur në pjesën  ekonomike japim një goditje shumë të fortë këtij grupi kriminal, duke e paralizuar atë.

Pavarësisht se ky është operacioni i parë i përbashkët që ne zhvillojmë  me kolegët spanjollë, unë besoj dhe shpresoj që do të vazhdojmë edhe në të ardhmen me zhvillimin e operacioneve të përbashkëta.

Suksese!”

• 

  Sukseset dhe dështimet e Presidencës sllovene të BE

• 

  Berisha shpall rezultatet e referendumit në selinë e PD-së të rrethuar nga Garda: Të hënën nisin protestat anti-qeveritare

• 

  Basha në Kuvend, Berisha në referendum, kundër njëri tjetrit

• 

  Terrorizmi – Shqipëria rrezikohet nga Irani

• 

  Berisha sfidon Bashën; hyn me të vetët në selinë e PD-së

• 

  Arrestohet në Romë, ish kryeprokurori Adriatik Llalla