Putin punon fshehurazi nga një “zyrë identike” në Soçi?

Një raport nga një media ruse pretendon se Kremlini ka ndërtuar një zyrë për presidentin rus, Vladimir Putin, në Soçi, e cila është identike me zyrën e tij jashtë Moksës, dhe se Putin shpesh dhe fshehurazi ka punuar nga zyra në Soçi, në muajt e fundit.

Megjithatë, nuk ka ende konfirmim të pavarur të raportit në ueb-faqen Proyekt Media, e cila tha se zëdhënësi i Kremlinit, Dmitry Peskov, ka refuzuar të përgjigjet në pyetjen për këtë çështje.

Një tjetër publikim rus në internet, Daily Storm, citoi Peskovin të ketë thënë se raporti i Proyekt Medias është “marrëzi” dhe se Putin “punon në Moskë”.

Nëse është i vërtetë, raporti do të shtonte prova të reja për masat që ka ndërmarrë Kremlini për të izoluar Putinin nga pandemia e koronavirusit.

Në raportin e saj, Proyekt Media citoi dy burime të paidentifikuara që tha se “kanë njohuri për oarin e kreut të shtetit” dhe një menaxher të lartë në një kompani të drejtuar nga shteti.

Publikimi po ashtu analizoi të dhënat e fluturimeve të avionit presidencial që përdor Putini për të udhëtuar në dhe jashtë vendit.

Si shumë vende, Rusia ka ndërmarrë masa izolimi për të frenuar përhapjen e koronavirusit, duke kufizuar lëvizjen dhe duke kërkuar nga shumë qytetarë që të punojnë nga distanca.

Putin ka mbajtur kryesisht video-konferenca me guvernatorët dhe ministrat e kabinetit, si dhe fjalime televizive.

Ai po ashtu ka zhvilluar disa takime ballë për ballë me grup të zgjedhur individësh.

Si pjesë të provave të saj, Proyekt Media citoi një video-konferencë që Putin ka mbajtur më 2 nëntor me një grup nxënësish rusë.

Kremlini, pasi ka lëshuar një fotografi, ka thënë se Putin ka qenë në rajonin e Moskës kur ka mbajtur konferencën.

Por, Proyekt Media, duke cituar një person në dijeni për situatën, tha se anëtarët e stafit të presidentit kanë qenë në Soçi atë ditë.

Më 3 nëntor, avioni presidencial është shfaqur duke u nisur nga Soçi për në Shën Petersburg, ku Putin ka marrë pjesë në zbulimin e një akullthyesi të ri.

Proyekt Media gjithashtu tha se shumë gazetarë të akredituar në Kremlin kanë pasur qasje më të kufizuar te Putini në muajt e fundit.

Masat e tjera që ka shpikur Kremlini për të zvogëluar rrezikun e infektimit të Putinit me koronavirus përfshijnë instalimin e tuneleve dezinfektuese në Kremlin dhe në Novo-Ogarjovo, ku ndodhet zyra e presidentit.

Këto tunele u ngjajnë kontrolleve të sigurisë në aeroporte dhe i spërkasin vizitorët me një mjegull anti-septike derisa ata kalojnë. REL

• 

  Kriza e varësisë nga droga në Afganistan

• 

  Anijet luftarake ruse dhe kineze bëjnë patrullimet e para të përbashkëta në Paqësor

• 

  Kina, Rusia dhe Afganistani, çështjet kryesore në takimet e Sekretarit Austin në Bruksel

• 

  Vritet në një goditje ajrore amerikane një udhëheqës i lartë i al-Kaidës

• 

  Erdogan kërkon që 10 ambasadorë të shpallen “non grata”

• 

  Paralajmërimi i zbulimit amerikan: Kina rrezikon të mbizotërojë teknologjitë e përparuara