e premte 19 gusht 2022
e premte 19 gusht 2022

 

Qindra refugjatë nga Afrika, Azia dhe Lindja e Mesme u lanë nën qiell të hapur të mërkurën kur dështuan përpjekjet për t’i zhvendosur në një pikë tjetër në Bosnje, pasi qendra ku strehoheshin u shkatërrua nga zjarri, tha policia dhe disa refugjatë.

Zjarri shkatërroi javën e kaluar Kampin Lipa pranë Bihacit në Bosnjen perëndimore. Refugjatët prisnin të transferoheshin në Bradina, një qytet 320 km më larg, në Bosnjen qendrore.

Fillimisht refugjatët u futën në autobusë dhe pritën më shumë se një ditë në të ftohtin e dimrit për udhëtimin në qendrën e re, por nuk mund të lëviznin pasi nuk ishte arritur marrëveshje se ku do të dërgoheshin.

“Autobusët po largohen nga Lipa pa refugjatë,” tha përmes portalit mediatik Klix.ba Nermin Kljajic, përfaqësues i ministrisë së Brendshme në komunën Unsko-Sanska.

Refugjatët dolën nga autobusët dhe u vërtitën nëpër zonën me baltë si dhe pyjet përreth e pastaj u kthyen në kampin e djegur. Të mbështjellë me xhaketa dimri, me shalle e kapele, ata mbanin në duar ato pak zotërime që kishin, tregon një gazetar i agjencisë së lajmeve Reuters, i cili ishte në zonë.

“Na urdhëruan të shkojmë në Lipa. Nuk dimë se çfarë të bëjmë dhe si të vazhdojmë jetën këtu,” thotë për agjencinë Reuters një imigrant nga Afganistani.

Mungesa e një marrëveshjeje mes autoriteteve lokale në Bosnje lidhur me destinacionin e refugjatëve e ka ndërlikuar situatën. Imigrantët janë përpjekur pa sukses të kalojnë kufirin me Kroacinë për të shkuar në vendet perëndimore evropiane.

Të martën, media lokale citoi ministrin e Sigurisë të Bosnjes Selmo Cikoti, sipas të cilit refugjatët do të vendoseshin në kazerma ushtarake në Bradina. Por ministri i Financave Vjekoslav Bevanda tha se nuk ishte arritur ndonjë marrëveshje.

“Mendoj se çdo vend duhet të mbajë një pjesë të barrës së krizës së refugjatëve,” tha zoti Kljajic për Klix.ba.

Më parë, banorët e Bradinas organizuan protesta kundër njoftimeve se refugjatët mund të silleshin në qytetin e tyre.

Kampi Lipa, i cili u hap si një strehë e përkohëshme për muajt e verës, strehonte rreth 1,200 vetë dhe ishte në plan të mbyllej të mërkurën për riparimet e dimrit.

Qeveria qendrore ka dashur t’i strehonte refugjatët përkohësisht në kampin Bira në Bihac, rreth 25km larg, një kamp i mbyllur në tetor. Por autoritetet lokale nuk ishin dakord, duke thënë se edhe pjesë të tjera të Bosnjes duhet të mbajnë një pjesë të barrës.

Bashkimi Evropian, i cili e ka mbështetur Bosnjen me 60 milionë euro për të përballuar krizën dhe ka premtuar 25 milionë euro shtesë, u ka kërkuar në mënyrë të përsëritur autoriteve të gjejnë një alternativë të përshtatshme për Kampin Lipa, duke paralajmëruar se po afron një krizë humanitare. Rreth 10,000 refugjatë janë aktualisht të bllokuar në Bosnje.

 

Më shumë

Bosnjë Hercegovina: “Konflikt i ngrirë me paqe të papërfunduar”

Bosnjë Hercegovina diskutohet në Këshillin e Sigurimit. Qëndrimi i SHBA-së: Asnjë etnitet nuk ka të ardhme jashtë Bosnjë Hercegovinës.     Kur flitet për Bosnjën në Këshillin e Sigurimit e marrin fjalën shumë palë: Anëtarët e Këshillit të Sigurimit, ata të përhershmit Rusia dhe SHBA, Franca, Mbretëria e Bashkuar dhe Kina dhe 8 të […]

Bosnja pritet të diskutojë njohjen e Kosovës

Në Sarajevë sot pritet të debatohet për njohjen e Kosovës dhe lëvizjen e Ambasadës së Bosnjë e Hercegovinës nga Tel Avivi në Jerusalem.   Në takimin e rregullt të Presidencës do të diskutohet edhe kriza e emigranteve në Bosnjë dhe situata epidemiologjike në vend.   BeH nuk e ka njohur ende Kosovën shtet […]

25 vjet nga masakra e Srebrenicës

25 vjet më parë, rreth 8 mijë burra dhe djem myslimanë u vranë nga forcat serbe të Bosnjës në masakrën më të madhe të Evropës që nga Lufta e Dytë Botërore. Më shumë se 1 mijë burra dhe djem boshnjakë që vdiqën gjatë rrethimit të vitit 1995 konsiderohen ende të zhdukur. Më shumë se […]

Bosnjë-Hercegovina mbetet e përçarë edhe 25 vjet pas Dejtonit

Këshilli i Sigurimit të OKB mbajti këtë javë një debat virtual për Bosnjë-Hercegovinën. Përfaqësuesi i Lartë, Valentin Inzko, foli mbi procesin e zbatimit të paqes në BH në periudhën 16 tetor – 15 prill.   Duke folur për gjendjen e përgjithshme politike Valentin Inzko, thotë se liderët politikë dhe institucionalë në BH kanë treguar gatishmëri […]

  • © 2017 Albanian Profile Të gjitha të drejtat e rezervuara