Strasburgu urdhëron pezullimin e dëbimit të Selami Simsek në Turqi

Gjykata e Strasburgut i ka kërkuar autoriteteve shqiptare të pezullojnë vendimin për të dëbuar turkun Selami Simsek.

Drejtësia evropiane ka bërë kështu sigurim padie për Simsekun, të cilit më 2 korrik autoritetet shqiptare i refuzuan kërkesën për azil politik.

Simsek e pati paditur në Gjykatën Administrative mohimin e të drejtës për azil nga Ministria e Brendshme, padi që në dhjetor u rrëzua, por sidoqoftë ai kishte si mundësi edhe apelin.

Kështu deri në pritje të vendimit të Apelit, sipas autoriteteve evropiane Simsek duhet të mos dëbohet për në Turqi.

Turku u arrestua në vitin 2019 në aeroportin e Rinasit teksa po udhëtonte tranzit për në Kanada së bashku me një të njohurin e tij, Harun Çelik. Të dy u pikasën me dokumente false dhe për këtë u dënuan me një vit burg.

Pas shlyerjes së dënimit, Harun Çelik u dëbua nga Shqipëria më 1 janar 2020, pasi i qe mohuar e drejta e azilit. Pas tij, Simsek kërkoi gjithashtu azil dhe deri më sot mbetet në qendrën e mbyllur për emigrantët në Kareç të Vorës pa e fituar ende azilin.

Në Turqi si Çelik, po ashtu edhe Simsek cilësohen anëtarë të organizatës së Fethullah Gülen, të cilin Ankaraja zyrtare e akuzon si përgjegjës për puçin e dështuar të shtetit në vitin 2016. Të dy i kanë paraqitur autoriteteve shqiptare argumente, sipas së cilave në Turqi nuk u garantohet proces i rregullt gjyqësor dhe largimin për në Kanada e shihnin si rrugë për t’iu larguar përndjekjes politike, raporton euronews.

Autoritetet shqiptare kanë marrë vazhdimisht kritika për mënyrën se si i qasën kërkesat për azil të dy turqve. Eurodeputetë të ndryshëm kërkuan transparencë për procedurat e ndjekura, ndërkohë që në maj 2020 Organizata e Kombeve të Bashkuara nisi hetim për dyshime të mundshme në shkelje të të drejtave të njeriut.

• 

  Nuk respektonte masat anti-covid, dëbohet nga Tirana diplomati rus

• 

  Vdekja e ushtarakut në Afganistan, MM: Hetim të plotë për ngjarjen

• 

  Shpërthimet alarmojnë Lezhën, banorët rrëfejnë tmerrin: Erdhën nga ajri, kemi frikë për cunam

• 

  Me shkarpa në krah për të ngrohur nxënësit, mësuesi nga Pogradeci prek rrjetin

• 

  Krimet më të shpeshta kibernetike në Shqipëri për vitin 2020

• 

  Rrebeshe shiu në 22-26 janar, Agjencia e Mbrojtjes Civile paralajmëron prefektët e bashkitë