e diel 25 korrik 2021
e diel 25 korrik 2021

 

Dhoma Amerikane e Tregtisë publikoi sot Raportin mbi Agjendën e Investimeve dhe 40 Rekomandime mbi Përmirësimin e Klimës së Biznesit në Shqipëri.

 

Krahas një strategjie për thithjen e investimeve të huaja, Dhoma Amerikane shtimin e masave kundër korrupsionit.

 

Raporti u përgatit pas intervistimit të 220 bizneseve shqiptare dhe ndërkombëtare mbi punën dhe vështirësitë e tyre konkrete në terren.

 

Në raport thuhet se rasti kur një investues amerikan i profilit të lartë nuk mundi të investonte në aeroportin kryesor të Shqipërisë, nxori në dritë problemet e mëdha me zbatimin e kontratave.

 

Shqipëria zbriti 19 pikë në renditjen e Bankës Botërore, sipas Raportit të saj “Bëj Biznes”, duke humbur terren përballë ekonomive konkurruese rajonale.

 

Ndërkohë, në Indeksi Vjetor i Biznesit të AmCham besueshmëria ra me 5 pikë përqindje – rënia më e madhe e besimit të komunitetit të AmCham në tetë vjet.

 

Këto tre zhvillime e shtynë AmCham të rendiste 40 rekomandime autoriteteve shqiptare për të përmirësuar konkurrueshmërinë e ekonomisë shqiptare dhe përmirësimin e klimës së biznesit.

 

Më kryesori sipas saj, është hartimi i një strategjie për të tërhequr investimet e huaja direkte në sektorët strategjikë të ekonomisë, dhe vëzhgimi i saj nga nivelet më të larta të qeverisë.

 

Kjo nevojitet për të fuqizuar këta sektorë, për të ngritur infrastrukturën mbështetëse, për të reduktuar përqëndrimin e tregut dhe proceset e paefektshme.

 

“Zhvillimi dhe zbatimi i një programi efektiv kundër korrupsionit, për të ndërtuar besimin e publikut përmes luftës pa kompromis ndaj kësaj dukurie me masa ndëshkuese dhe me transparencë. Po ashtu nevojitet rritja e transaprencës dhe një sistem i hapur i prokurimeve publike larg ndikimeve politike” – thuhet në Raportin e Dhomës Amerikane të Tregtisë.

 

Mes kërkesave të tjera janë edhe konsultimet publike me qytetarët dhe investuesit, një sistem modern taksash, për të rritur konkurrueshmërinë dhe investimet atraktive, rritja e eksporteve shqiptare ne tregjet ndërkombëtare, zhvendosja nga ekonomia e parave cash tek economia digjitale si dhe trajnimi i punëtorëve në botën post-pandemike.

 

AmCham kreu vitin e fundit një seri vëzhgimesh dhe analiza me ekspertë për të parë klimën e investimeve dhe të biznesit në Shqipëri. “Sfidat e Shqipërisë në rrugën drejt integrimit në Bashkimin Europian, janë po aq të mëdha sa edhe mundësitë e gjera për t’u shfrytëzuar”, – thuhet në raport.

 

Nga një anë, vëzhgimet e komunitetit të biznesit, që konfirmohen edhe nga raporte të besueshme ndërkombëtare, flasin për një klimë biznesi joefektive dhe të shtrenjtë në Shqipëri, vështirësi u përkeqësuan gjatë periudhës së pandemisë.

 

Por nga ana tjetër, Shqipëria ka vend-ndodhje dhe burime natyrore si dhe një fuqi punëtore të talentuar.

 

“Hapat e reja drejt BE-së dhe marrëveshja e fundit ekonomike me SHBA-të ofrojnë mundësi unike e të mëdha në periudhë afatgjatë” – theksohet në raport.

 

Edhe organizata të tjera biznesi dhe qendra studimore vlerësojnë se korrupsioni mbetet pengesë kryesore në zhvillimin e Shqipërisë, sepse është ngritur deri në nivelin e kapjes së shtetit.

 

Drejtuesi i Qendrës për Kërkime Ekonomike, Zef Preçi, thotë se raporti i sotëm i Dhomës Amerikane është edhe një tjetër konfirmim shqetësues i studimeve të Qendrës mbi përkeqësimin e klimës së biznesit, sidomos vitet e fundit.

 

“Përkeqësimi i menjëhershëm i statusit të vendit në perceptimin e besimit të komunitetit të biznesit amerikan në ekonominë tonë është një sinjal që qeveria duhet të ndryshojë kursin e shpallur të reformave për t’u fokusuar në probleme që ndihmojnë në shëndoshjen e gjendjes dhe daljes nga kjo situatë krize dhe rrethi vicioz, ku premohen reforma dhe ato nuk ndërmerren” – tha zoti Preçi.

 

Ngadalësia në reformimin e drejtësisë, sipas tij, ka vonuar edhe zgjidhjen e mospajtimeve midis bizneseve mes tyre dhe midis bizneseve dhe qeverisë, e cila e ka shtuar arbitraritetin ndaj tyre, ndërsa vendim-marrja është përqëndruar në pak duar.

 

“Sistemi i prokurimit, megjithë uljen e numrit të rasteve me prokurim të drejtpërdrejtë pa negocim pa shpallje publike, përsëri vazhdon të jetë një atribut i një numri të kufizuar sipërmarrjesh të njohura si klientë të qeverisë dhe si oligarkë” – tha zoti Preçi.

 

Problemi tjetër më i madh është ndryshimi i shpeshtë i akteve ligjore pa u konsultuar me grupet e interesit dhe që shpesh dëmtojnë bizneset në garën mes tyre. Gjergj Buxhuku, drejtues i organizatës Alb-konfindustria dhe Qendrës Studimore të saj, thotë se në 30 vite edhe korrupsioni shqiptar është zhvilluar dhe modernizuar shumë nga dhënia e parave në zarfe e deri në nivelin e kapjes së shtetit, state capture.

 

“Sot, sëmundja e rëndë e korrupsionit, ose shfaqja më e dukshme e korrupsionit, ajo që ka pasoja më të rënda për mjedisin e biznesit, për qytetarët dhe vet demokracinë shqiptare, është korrupsioni i tipit të kapjes së shtetit. Korrupsioni State Capture është korrupsioni, i cili bëhet kryesisht në tregjet strategjike, pra, në tregjet më të rëndësishme të vendit. ky është një lloj korrupsioni, ku edhe sistemi gjyqësor e ka të vështirë të depërtojë për të ndëshkuar” – tha zoti Buxhuku.

 

Shpresa më e madhe, sipas tij, mbetet reformimi i thellë i sistemit të drejtësisë, që ai të godasë kapjen e shtetit.

 

“Ka ardhur koha që edhe një herë të mbështesim me të gjithë fuqitë tona reformimin e thellë e të shpejtë në sistemin e drejtësisë, në mënyrë që ky të depërtojë në atë korrupsion të rëndë në nivelet e larta, i cili është edhe mjaft i ndërlikuar për t’u trajtuar ashtu si duhet dhe për t’u zgjidhur” – tha zoti Buxhuku.

 

Dhoma Amerikane e Tregtisë deklaroi në konferencën vjetore të pranverës se presioni i efekteve të pandemisë mbi bizneset është i jashtëzakonshëm, në klimën problematike të biznesit komuniteti i investitorëve ka mungesë besimi, ndërsa korrupsioni, kërcënimi më i madh për të ardhmen ekonomike të Shqipërisë.

 

“Asnjë nga mundësitë për zhvillim dhe biznes që ofron vendi nuk do të japë frytet e pritshme pa luftuar korrupsionin, që është një nga 3 pengesat më të mëdha të qarqeve të biznesit” – tha në mars Presidenti i AmCham, Enio Jaço.

 

Dhoma Amerikane e Tregtisë vlerësoi se mundësitë për rritjen ekonomike të Shqipërisë janë të shumta, por duhet përmirësuar klima dhe besimi i komunitetit të bizneseve, duke përfituar nga pozicioni strategjik në rajon. VOA

 

 

 

Më shumë

Frutat dhe perimet e Shqipërisë, pa taksë doganore drejt BE deri në 2025

Agjencia Shqiptare e Zhvillimit të Investimeve bën me dije se eksportuesit shqiptarë mund të eksportojnë produkte bujqësore pa taksë doganore në BE deri në vitin 2025.   Sipas njoftimit Bashkimi Europian ka zgjatur skemën pa taksa për importin e frutave dhe perimeve nga vendet e Ballkanit Perëndimor deri në fund të vitit 2025.   […]

Mbyllja e Kapshticës lë stok mollët e Korçës

Më shumë se gjysma e prodhimit të mollëve në Korçë ka mbetur stok.  Në Zëmblak fermerët ankohen se tonelata mollë po kalben në magazina për shkak të mungesës së tregut ose po  përdoren si ushqim për bagëtinë.   “Gjysmat i hëngrën dhitë. Nuk qarkullojnë mollët jashtë. Nuk i ha tërë Korça mollët dhe Tirana. […]

Biznesi Kosovë-Shqipëri, kërkohet eliminimi i barrierave në eksport

Obligimi i bizneseve që kanë numër të madh të artikujve që për çdo lloj të produktit, edhe pse kanë përbërjen e njejtë por dallojnë në peshë t’i kërkohet raporti i analizave me vulë të njomë, si pjesë e eleminimit të barrierave tregtare si dhe procedurat burokratike ishin disa nga pikat kyqe të cilat u […]

Raporti vjetor – Portit i Durrësit, përpunoi mbi 3.8 milionë tonë mallra

Kryeson Terminali Perëndimor, në të cilin u ruajt trendi i 2019-ës, me një rritje prej 35 mijë tonë mallra më shumë   Gjatë 12-muajve në Portin më të madh të vendit, janë përpunuar rreth 3 milionë e 882 mijë tonë mallra gjithsej.   Sipas të dhënave Statistikore të Autoritetit Portual Durrës, vetëm në Terminalin […]

  • © 2017 Albanian Profile Të gjitha të drejtat e rezervuara