Duke parë shifrat gjithnjë e në rritje të klandestinëve që zgjedhin Shqipërinë si trampolinë për të kaluar ilegalisht drejt vendeve të BE-së, në fund të qershorit Policia e Shtetit lançoi operacionin e koduar “Perimetri”.
Sipas të dhënave gjatë dy muajve të fundit janë arrestuar në flagrancë mbi 40 persona duke transportuar qindra emigrantë nga kufiri me Greqinë drejt atij me Malin e Zi, kundrejt shifrave që variojnë nga 200 deri në 500 euro për person.
Dhe mesa duket ky biznes rezulton fitimprurës për trafikantët. Sipas burimeve nga Policia Kufitare në një pjesë të mirë të rasteve të konstatura, ka rezultuar se trafikantët kanë marrë automjete luksoze me qera për të transportuar emigrantët duke menduar se nuk do të tërheqin vëmendjen e policisë.
Prej qershorit të 2019 kufiri me Greqinë monitorohet edhe nga forcat e “Frontex” dhe sipas burimeve çdo ditë ndalohen 30 deri në 40 emigrantë duke kaluar ilegalisht në kufirin e gjelbër. euronews
